ރާއްޖެއަށް ޗުއްޓީ ހޭދަކުރުމަށް އަންނަ ފަތުރުވެރިންނަށް އެއް ރިސޯޓުން އަނެއް ރިސޯޓަށް ދެވޭ ގޮތަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ހުއްދަ ދީފިއެވެ.

ކޮވިޑް-19 ގެ ހާލަތާ ގުޅިގެން އެޗްޕީއޭގެ ގައިޑްލައިންތަކަށް ގެނައި ބަދަލުތަކާއި އެކު ފަތުރުވެރިން، އެއް ރިސޯޓުން އަނެއް ރިސޯޓަށް ދިޔުން އޮތީ މަނާކޮށްފައެވެ. އެ ގައިޑްލައިންގެ ދަށުން ރާއްޖެ އަށް އެތެރެވާ ފަތުރުވެރިންނަށް ޗުއްޓީ ހޭދަ ކުރުމުގެ ހުއްދަ ލިބެނީ އެންމެ ރިސޯޓެއްގައެވެ. އެއީ ކުރިޔާލާ ބުކް ކޮށްގެންނެވެ.

އެކަމަކު ހޯމަ ދުވަހުން ފެށިގެން، ރާއްޖެއަށް ޒިޔާރަތްކުރާ ފަތުރުވެރިންނަށް ގިނަ ދުވަހު ޗުއްޓީ ހޭދަ ކުރާ މުއްދަތު އިތުރު ކުރުމަށް ބާރުއެޅުމުގެ ގޮތުން ހެލްތް އިމަރޖެންސީ އޮޕަރޭޝަން ސެންޓަރު (އެޗްއީއޯސީ) ގައި އެޗްޕީއޭއާ ޓޫރިޒަމް މިނިސްޓްރީ އަށް މަޝްވަރާކޮށް ފަތުރުވެރިންނަށް އެއް ރަށުން އަނެއް ރަށަށް ދެވޭ ގޮތަށް ''ސްޕިލިޓް ސްޓޭ'' ހުއްދަ ދޭން ވަނީ ނިންމާފައެވެ.

ޓޫރިޒަމް މިނިސްޓްރީން ބުނީ، ހުއްދަ ދޫކުރެވޭނީ އެޗްޕީއޭ އިން ކަނޑައަޅާފައިވާ ''ސްޕިލިޓް'' ގައިޑްލައިންތަކަށް ފެތޭ ރިސޯޓުތަކުން، ޝަރުތުތައް ފުރިހަމަ ކުރުމަށް ފަހު އެ މިނިސްޓްރީ އަށް ހުށައެޅުމުން ކަމަށެވެ. އަދި ހުއްދަ އަށް އެދި ފަތުރުވެރިޔާ ދަތުރު ކުރުމަށް ހަމަޖެހިފައިވާ ތާރިހުގެ ދެ ދުވަސް ކުރިން ހުށައަޅަން މިނިސްޓްރީން އިލްތިމާސް ކުރެއެވެ.

ކޮވިޑުގެ ހާލަތާއި ގުޅިގެން ރާއްޖޭގެ ފަތުރުވެރިކަމުގެ ސިނާއަތަށް ވަނީ މިއިން ދުވަހަކުވެސް ނުވާ ވަރުގެ ބޮޑު ހީނަރުކަމެއް އައިސްފައެވެ. ރާއްޖޭގެ ބޯޑަރުތައް ހުޅުވާލި ކަމުގައިވިޔަސް ފަތުރުވެރިން ޒިޔާރަތް ކުރާ މިންވަރު އަދި މަދެވެ.

މި ދުވަސްވަރު ރާއްޖެ އަށް ޒިޔާރަތް ކުރާ ގިނަ ފަތުރުވެރިންނަކީ މަތީ ފަންތީގެ ރިސޯޓުތަކަށް އަންނަ ފަތުރުވެރިންނެވެ. ފަތުރުވެރިކަމުގެ ދާއިރާގައި މަސައްކަތް ކުރާ މާހިރުން ލަފާކުރާ ގޮތުން މި އަހަރުގެ ފަހުކޮޅު ރާއްޖެ އަށް ޒިޔާރަތް ކުރާ ފަތުރުވެރިންގެ އަދަދު ގިނަވެގެންދާނެއެވެ.