ކޮންމެ ސަބަބަކާހުރެ ވިޔަސް އާންމު ސިއްޙަތުގެ ނިޒާމަށް ހުރަސްއެޅުން ބަލައި ނުގަނެވޭ ކަމަށް ހޯމް މިނިސްޓަރ ޝެއިޙް އިމްރާން އަބްދުﷲ ވިދާޅުވެއްޖެއެވެ.
ހޯމަ ދުވަހު މިނިސްޓަރ އިމްރާން ކުރެއްވި ޓްވީޓެއްގައި ވިދާޅުވީ، ސިޔާސީ ސަބަބަކާހެދި ވިޔަސް ނުވަތަ އެހެން ސަބަބަކާ ހެދި ވިޔަސް، އާންމު ސިއްޙަތުގެ ނިޒާމަށް ހުރަސް އެޅުމަކީ ބަލައިގަނެވޭނެ ކަމެއް ނޫން ކަމަށެވެ. އަދި އެފަދަ މައްސަލަތައް ބަލައި، އަޅަންޖެހޭ ފިޔަވަޅުތައް ސަރުކާރުން އަޅާނެކަމަށް ވެސް މިނިސްޓަރ ވިދާޅުވިއެވެ.
މިނިސްޓަރ އެހެން ވިދާޅުވެފައިވާއިރު، ހުކުރު ދުވަހު ޕްރޮގްރެސިވް ކޯލިޝަނުން ''ރާއްޖެ ވިއްކާލުމުގެ'' ނަމުގައި މާލޭގައި ބޭއްވި ސައިކަލް ބުރުގައި ހެލްތް ޕްރޮޓެކްޝަން އޭޖެންސީ (އެޗްޕީއޭ) ގެ ގައިޑްލައިންތަކާ ޚިލާފުވުމުގެ ސަބަބުން އެ މައްސަލަ ފުލުހުން ވަނީ ބަލާފައެވެ.
އަދި ޕީޕީއެމް/ޕީއެންސީގެ ލީޑަަރޝިޕްގެ އިސް ބޭފުޅުން ފުލުހަށް ހާޒިރުކޮށް އެޗްޕީއޭގެ ގައިޑްލައިންއާ ހިލާފުވެފައިވާތީ ޖޫރިމަނާ ކޮށްފައިވާއިރު، 1000 ރުފިޔާ އިން ޖޫރިމަނާ ކުރި ބޭފުޅުންގެ ތެރޭގައި ޕީއެންސީގެ ރައީސް އަބްދުއްރަހީމް އަބްދުﷲ، ރައްޔިތުންގެ މަޖިލީހުގެ ބާރަށު ދާއިރާގެ ކުރީގެ މެމްބަރު އިބްރާހިމް ޝުޖާއުގެ އިތުރުން ޕީއެންސީގެ ނައިބް ރައީސް އަދި ނައިފަރު ދާއިރާގެ މެމްބަރު އަހުމަދު ޝިޔާމް ވެސް ހިމެނިވަޑައިގަންނަވައެވެ.
ގައިޑްލައިންތަކާއި ހިލާފުވެގެން ކުރީގެ ރައީސް އަދި ޕްރޮގްރެސިވް ކޯލިޝަންގެ އެޑްވައިޒަރު ޑރ. ވަހީދު ހަސަން މަނިކު ވެސް ފުލުހަށް ހާޒިރު ކުރިއެވެ. އިދިކޮޅުން ބުނަމުންދަނީ ފުލުހަށް ހާޒިރުކުރިޔަސް ފަހަތަށް ނުޖެހޭނެ ކަމަށާއި، ރައްޔިތުންގެ އަޑު އުފުލަމުންދާނެ ކަމަށެވެ.