ކޮވިޑް-19 އާ ގުޅިގެން ދިވެހި އަސްކަރިއްޔާ (އެމްއެންޑީއެފް) އިން ޚަރަދުތަށް ކޮށްފައިވަނީ ދައުލަތުގެ މާލިއްޔަތު ގާނޫނާއި ގަވާއިދާއި އެއްގޮތަށް ކަމަށް އޮޑިޓާ ޖެނެރަލް އޮފީހުން ބުނެފިއެވެ.

ކޮވިޑް-19 އާ ގުޅިގެން މޯލްޑިވްސް ނޭޝަނަލް ޑިފެންސް ފޯސް އިން 1 ޖަނަވަރީ 2020 އިން 30 ޖޫން 2020 ގެ ނިޔަލަށް ކުރި ޚަރަދު ކަމަށް ކޮމްޕްލަޔަންސް އޮޑިޓްގައި ހިމަނާފައިވާ ޚަރަދުތަކަކީ މައިގަނޑުގޮތެއްގައި ދައުލަތުގެ މާ ލިއްޔަތުގެ ޤާނޫނާއި، ދައުލަތުގެ މާލިއްޔަތުގެ ގަވާއިދާއި، މިނިސްޓްރީ އޮފް ފިނޭންސުން ކަނޑައަޅުއްވާފައިވާ އުޞޫލުތަކާއި އެއްގޮތަށް ކޮށްފައިވާ ޚަރަދުތަކެއް ކަމަށް އެ އޮފީހުން ދެކޭ ކަމަށް ވަނީ ބުނެފައެވެ.

ދައުލަތުގެ ބަޖެޓުން ކޮވިޑް-19 އާ ގުޅިގެން އެމްއެންޑީއެފުން ކުރަން ޖެހޭ ޚަރަދުކުރުމަށް ކަނޑައަޅާފައިވަނީ 17،049،230 (ސަތާރަ މިލިއަން ސާޅީސް ނުވަހާސް ދުއިސައްތަ ތިރީސް) ރުފިޔާއެވެ.

އެ ޙަރަދުތައް ކޮށްފައިވަނީ ކޮވިޑް-19 އާ ގުޅޭ އޮޕަރޭޝަންގައި ބޭނުންކުރި ކަނޑު އުޅަނދުފަހަރަށް ތެޔޮ އެޅުމަށް 3،221،054 (ތިން މިލިއަން ދެލައްކަ އެކާވީސް ހާސް ފަންސާސް ހަތަރު) ރުފިޔާ، ކޮވިޑް-19 އާ ގުޅޭ އޮޕަރޭޝަންގައި ބައިވެރިވާ ސިފައިން ތިބި މަރުކަޒުތަކަށް ބޭނުންވާ ސަޕްލައިޒްއަށް 638،009 (ހަ ލައްކަ ތިރީސް އަށްހާސް ނުވަ) ރުފިޔާއެވެ.

މީގެ އިތުރުން ކޮވިޑް-19 އާ ގުޅޭ ގޮތުން ހޯދުނު ޚިދުމަތްތަކުގެ ޚަރަދަށް 26،500 ރުފިޔާއާއި މަރާމާތު ކުރުމާއި ބެލެހެއްޓުމުގެ ޚަރަދަށް 1،045،753 (އެއް މިލިއަން ސާޅީސް ފަސް ހާސް ހަތްސަތޭކަ ފަންސާސް ތިން) ރުފިޔާ އަދި ސިފައިން ތިބި މަރުކަޒުތަކަށް ހޯދުނު ހަރުމުދަލަށް 310،786 (ތިންލައްކަ ދިހަހާސް ހަތްސަތޭކަ އައްޑިހަ ހަ) ރުފިޔާއެވެ. މި ކަންކަމަށް ކުރެވުނު ޚަރަދުގެ ޖުމްލަ އަދަދަކީ 5،242،102 (ފަސް މިލިއަން ދެލައްކަ ސާޅީސް ދެހާސް އެއްސަތޭކަ ދެ) ރުފިޔާއެވެ.

ޚަރަދު ކުރުމަށް ކަނޑައެޅުނު ބަޖެޓުން ޚަރަދު ކުރެވުނު ފައިސާ ކަނޑައި ބާކީ ޖުމްލަ އަދަދަކީ 11،807،128 (އެގާރަ މިލިއަން އައްލައްކަ ހަތްހާސް ސަތޭކަ އަށާވީސް) ރުފިޔާއެވެ.