ސަރުކާރުގެ ފަރާތުން މަކުނުދޫ ދާއިރާގެ މަޖިލިސް މެންބަރު މުޙައްމަދު ރާއީ ހުށަހެޅުއްވި ވިޔަފާރީގެ ދާއިރާގައި ވާދަވެރިކަން އުފައްދައި ދެމެހެއްޓުމުގެ ބިލު ފާސްކޮށްފިއެވެ.

އަންގާރަ ދުވަހުގެ ޖަލްސާގައި މި ބިލު ފާސްކުރުމަށް ޖަލްސާއަށް ހާޒިރުވެ ތިއްބެވި 62 މެންބަރުން ވޯޓު ދެއްވިއެވެ.

ސަރުކާރުގެ ފަރާތުން މި ބިލު ހުށަހެޅުމުގެ ބޭނުމަކީ ދިވެހިރާއްޖޭގައި ވިޔަފާރި ދާއިރާގައި ވާދަވެރިކަން އުފައްދާ ދެމެހެއްޓުމަށާއި، ވިޔަފާރީގެ ދާއިރާގެ ކަންކަން ހަނިވާގޮތަށް ހިންގާ ވިޔަފާރީގެ އަމަލުތަކުގެ ސަބަބުން ޤައުމުގެ އިޤުތިޞާދީ ކުރިއެރުމަށް ކުރާ ނޭދެވޭ އަސަރުތައް ހުއްޓުވުމެވެ.

އަދި ވިޔަފާރީގެ ދާއިރާގެ ވާދަވެރި ކަމަށް ހުރަސްއަޅާ އެއްބަސްވުންތަކާއި، އެފަދަ ވިޔަފާރީގެ އަމަލުތައް މަނާކުރުމާއި، އެފަދަ އަމަލުތައް ހިންގާ ފަރާތްތަކަށް ފިޔަވަޅު އެޅުމާ ގުޅޭ އުސޫލުތައް ބަޔާންކުރުމާއި، ވިޔަފާރީގެ ބާޒާރުގައި ނުފޫޒު ފޯރުވޭ މަގާމެއް ލިބިފައިވާ ވިޔަފާރިއަކުން އެފަދަ މަގާމެއްގެ ބޭނުން ނަހަމަގޮތުގައި ހިފުން މަނާކުރުމެވެ.

މީގެ އިތުރުން އެއް ވިޔަފާރިއެއް އަނެއް ވިޔަފާރިއާ އެއްކުރުމުގެ ސަބަބުން، ވިޔަފާރީގެ ދާއިރާގެ ވާދަވެރިކަމަށް ހުރަސްއެޅިގެންދާ ދިޔުން ކޮންޓްރޯލް ކުރުމުގެ ގޮތުން ކަމާ ބެހޭ އުސޫލުތައް އެކުލަވާލުމާއި، އަދި ވިޔަފާރީގެ ދާއިރާގައި ވާދަވެރިކަން އުފައްދައި ދެމެހެއްޓުމާ ބެހޭ ކަންކަން ބަލަހައްޓާ އިދާރާގެ ބާރުތަކާއި މަސްއޫލިއްޔަތުތައް ބަޔާންކުރުމަކީވެސް މި ބިލު ހުށަހެޅުމުގެ ބޭނުމެކެވެ.