ކޯޓުތަކަށް އައްޔަން ކުރަން ނަން ފޮނުވާފައިވާ ފަނޑިޔާރުންނާއި، މަގާމުތަކަށް ކުރިމަތިއްލައްވާ ފަނޑިޔާރުންނާ މެދު ސިޔާސީ ފަރާތްތަކުން، ރައްޔިތުންގެ މެދުގައި ނުބައި ތަސައްވަރެއް އުފެއްދުމުން ގާބިލު ފަނޑިޔާރުން އައްޔަން ކުރަން ހުރަސް އެޅޭ ކަމަށް ބަރ ކައުންސިލްގެ ރައީސް މައުމޫން ހަމީދު ވިދާޅުވެއްޖެއެވެ.

ފަނޑިޔާރުންނާ ގުޅޭ ގޮތުން ބައެއް މީޑިއާތަކުން އޮޅުން އަރާ ގޮތަށް މައުލޫމާތު ފަތުރަމުންދާތީ ބަރ ކައުންސިލްގެ ރައީސް ވަނީ ކަންބޮޑުވުން ފާޅުކުރައްވާފައެވެ.

ސުޕްރީމް ކޯޓުގެ ފަނޑިޔާރުކަމަށް، ކުރީގެ ރައީސް އަބްދުﷲ ޔާމީން އަށް ހުކުމް ކުރެއްވި ބެންޗުގައި ހިމެނިވަޑައިގަންނަވާ އަލީ ރަޝީދު ހުސައިން، އައްޔަން ކުރުމަށް ޖުޑީޝަލް ސަރވިސް ކޮމިޝަން (ޖޭއެސްސީ)ގެ މަޝްވަރާއަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އޭނާގެ ނަން ފޮނުވުމުން އިދިކޮޅުން ދަނީ ފާޑު ކިޔަމުންނެވެ. އިދިކޮޅުން ތުހުމަތު ކުރާ ގޮތުގައި ރައީސް، އަލީ ރަޝީދުގެ ނަން ފޮނުއްވެވީ ރައީސް ޔާމިނަަށް ނުހައްގުން ހުކުމެއް ކުރުމުގެ އިނާމެއްގެ ގޮތުންނެވެ.

އެކަމާއި ގުޅޭ ގޮތުން މީޑިއާތަކުގައި ދެކެވޭ ވާހަކަތަކާއި ގުޅިގެން މައުމޫން ވަނީ ޓްވީޓެއް ވެސް ކުރައްވާފައެވެ. ޓްވީޓްގެ ތަފްސީލު ރާއްޖެ.އެމްވީއާ ހިއްސާ ކުރައްވަމުން މައުމޫން ވިދާޅުވީ، ފަނޑިޔާރުންނާ ގުޅޭ ގޮތުން ސިޔާސީ ބޭފުޅުން ވިދާޅުވާ ވާހަކަތައް ''ކޯޓްކޮށް'' ރިޕޯޓް ކުރުން އެއީ އެންމެ ރަނގަޅު ގޮތްކަން ދެކިވަޑައިނުގަންނަވާ ކަމަށެވެ. އަދި ފަނޑިޔާރަކު ކުރެއްވި ހުކުމެއްގެ މައްސަލައެއް އުޅޭނަމަ އެކަން ހުށައަޅަން ޖެހޭ ފަރާތްތަކަށް ހުށައަޅައިގެން ކުރިޔަށް ގެންދެވޭނެ ގޮތްތައް އެބަހުރި ކަމަށް އޭނާ ވިދާޅުވިއެވެ.

މައުމޫންގެ މައިގަނޑު ކަންބޮޑުވުމަކީ ސިޔާސީ ފަރާތްތަކުން ވިދާޅުވާ އެއްޗެއް ވަޒަން ކުރުމެއް ނެތި ރިޕޯޓް ކުރުމެވެ. މައުމޫންގެ ވިދާޅުވި ގޮތުގައި ފަނޑިޔާރުންނަށް ވެސް އަދި ހުކުމްތަކަށް ވެސް ފާޑު ކިޔޭނެ އެވެ. އެކަމަކު ސިޔާސީ ފަރާތްތަކުން ފަނޑިޔާރުންނާ މެދު ނުބައި ތަސައްވަރެއް ގެންގުޅޭނަމަ ފަނޑިޔާރު ކަމަށް ކުރިމަތިލައްވަން ބައެއް ބޭފުޅުން ޖެހިލުން ވެވަޑައިގަންނަވާނެއެވެ.

މައުމޫން ވިދާޅުވީ، ފަނޑިޔާރުން ޖެހިލުންވެ ވަޑައިގަންނަވާނަމަ މަގާމުތަކަށް ކުރިމަތިއްލަވާ ކެންޑިޑޭޓުން މަދުވެ ބޭނުންފުޅުވާ ފެންވަރުގެ ބޭފުޅުން މަގާމުތަކަށް އައްޔަން ނުކުރެވޭނެ ކަމަށެވެ.