ކޮވިޑް 19އާއިގުޅިގެން އަޅާ ރައްކާތެރިކަމުގެ ފިޔަވަޅެއްގެގޮތުން މި އަހަރުގެ އަޟްޙާޢީދުނަމާދުގެ ބޮޑުޖަމާޢަތް އައްޑޫސިޓީގެ އެއްވެސް އަވަށެއްގައި ނުބާއްވާގޮތަށް ހަމަޖައްސައިފިއެވެ.
އައްޑޫ ސިޓީ ކައުންސިލުން ބުނީ އަޟްޙާޢީދުގެ ބޮޑުޖަމާޢައް ނުބޭއްވިނަމަވެސް އައްޑޫސިޓީގެ ހުކުރުކުރާ ހުރިހާ މިސްކިތެއްގައި މިއަހަރުގެ އަޟްޙާޢީދު ނަމާދުކުރުން އޮންނާނެކަމަށެވެ. ޢީދުނަމާދަށް ވަޑައިގަންނަވާއިރު މާސްކް އަޅުއްވައިގެން މުސައްލަހިއްޕަވައިގެން ޢީދުނަމާދުގެ ޖަމާޢަތަށް ވަޑައިގަތުމަށް ސަމާލުކަންދިނުމަށްވެސް ކައުންސިލުން ވަނީ އެދިފައެވެ.
އައްޑޫ ސިޓީގައި ބޮޑު ޖަމާޢަތުގައި އަޟްޙާ ޢީދު ނަމާދު ނުކުރާގޮތަށް ނިންމާފައިވާއިރު، މާލޭ ސިޓީގައިވެސް އަޟްޙާ ޢީދު ނަމާދު ބޮޑު ޖަމާޢަތުގައި ނުކުރާގޮތަށް އިސްލާމިކް މިނިސްޓްރީން ވަނީ ނިންމާފައެވެ. ނަމަވެސް މާލޭ ސިޓީގައި ވެސް އިސްލާމީ މަރުކަޒާއި ހުކުރުކުރާ މިސްކިތްތަކުގައި އީދު ނަމާދު ކުރުން އޮންނާނެ ކަމަށް އިސްލާމިކް މިނިސްޓްރީން ވަނީ ބުނެފައެވެ.
ކޮވިޑް-19 ފެތުރުން ކޮންޓްރޯލް ކުރުމަށް މާލެ ސަރަހައްދުގައި މިސްކިތްތަކުގައި ނަމާދު ކުރުން ތިން މަސް ދުވަހުގެ މުއްދަތަށް މެދުކަނޑާލުމަށްފަހު މިސްކިތްތައް ހުޅުވާލާފައިވަނީ ވަކި އުސޫލެއްގެ މަތިން ޖަމާޢަތުގައި ނަމާދުކުރުމަށް އެންގުމަށްފަހު އެވެ. އޭގެތެރޭގައި ހިމެނެނީ ގެއިން އަންނައިރު މުޞައްލަ ގެނައުމާއި، ކޮންމެ މީހަކު ވެސް އެމީހެއްގެ މުޞައްލާގައި ނަމާދު ކުރުމާއި، މާސްކު އެޅުމާއި އެކަކު އަނެކަކާއި ސަލާން ނުކުރުމެވެ. އަދި ގެއިން އަންނައިރު ވުޟޫކޮށްގެން އައުމަށް ވެސް ވަނީ އިރުޝާދު ދީފައެވެ.
