ސިޔާސީ ހަރަކާތް ހިންގުމުގައި އިންސާނީ ކަރާމަތާއި ސަލާމަތަށް އިސްކަން ދިނުމަށް އިލެކްޝަންސް ކޮމިޝަން (އީސީ)ގެ ނައިބު ރައީސް އަދި އެކޮމިޝަނުގެ ތަރުޖަމާނު އަހުމަދު އަކްރަމް ގޮވާލައްވައިފިއެވެ.

ބުދަ ދުވަހު އަކްރަމް ކުރެއްވި ޓްވީޓެއްގައި ވިދާޅުވެފައިވަނީ، ކޮވިޑް-19 ގެ ހާލަތު ރާއްޖޭގައި ގޯހުން ގޯހަށް ދާ ކަމަށެވެ. އަދި މިހާލަތުން އަރައި ގަތުމަށް އެންމެ އެކުގައި މަސައްކަތް ކުރަންޖެހޭ ކަމަށެވެ.

އަކްރަމް ވިދާޅުވީ، ސިޔާސީ ޕާޓީތަކުން ސިޔާސީ ހަރަކާތް ހިންގަންވާނީ ޤާނޫނުތަކާއި ޤަވާއިދުތަކަށް ބޯލަނބައި، އިންސާނީ ކަރާމާތާއި ސަލާމަތަށް އިސްކަން ދީގެން ކަމަށެވެ.

އާންމު ސިއްހަތު ރައްކާތެރި ކުރުމުގެ ގާނޫނުގެ ދަށުން، ރާއްޖޭގައި ވަނީ އާންމު ސިއްހަތުގެ ކުއްލި ނުރައްކަލުގެ ހާލަތު، މިދިއަ މާރިޗު މަހުގެ 12 ވަނަ ދުވަހު އިއުލާން ކޮށްފަ އެވެ. އާންމު ސިއްހަތުގެ ކުއްލި ނުރައްކަލުގެ ހާލަތު ހަމަ އެގޮތުގައި މެދުކެނޑުމެންނެތި ކުރިއަށްދާއިރު، އެގާނޫނުގެ ދަށުން، އާންމު ސިއްހަތު ރައްކާތެރި ކުުރުމުގެ ގޮތުން އަޅަންޖެހޭ ފިޔަވަޅުތައް އެޅުމުގެ ބާރު ޑިރެކްޓަރ ޖެނަރަލް އޮފް ޕަބްލިކް ހެލްތަށް ލިބިދީފައި ވެއެވެ.

އެގޮތުން، ބައެއް އެންގުންތައް އަންގާފައިވާއިރު، ގިނަ މީހުން ގައިގޯޅިވެ، އެއްވެ ނޫޅުމަށާއި، އަދި 30 މީހުންނަށް ވުރެ ގިނަ މީހުން ބައިވެރިވެގެން އެއްވެ ނޫޅުމަށް އަންގާފައި ވެއެވެ. އިޖުތިމާއީ ގައިދުރުކަން ބެހެއްޓުމާއި މާސްކު އެޅުންފަދަ އިސްކަންދިނުމަށް ވެސް އަންގާފައި ވެއެވެ.

އެއްވެ އުޅުމުގެ މިނިވަންކަމުގެ ގާނޫނުގެ ދަށުން ހަދާފައިވާ ގަވާއިދު ބުނާ ގޮތުން، މާލޭގައި އެއްވެ އުޅުވޭ ސަރަހައްދަކީ ކާނިވާ ސަރަހައްދެވެ.

ނަމަވެސް އިދިކޮޅު ޕީޕީއެމް-ޕީއެންސީ، ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން އަބްދުލްގައްޔޫމް މިނިވަން ކުރުމަށް ގޮވާލާ، މާލޭގެ ބޮޑެތި މަގުތަކުގައި މުޒާހަރާ ކުރަން މިވަނީ ފަށާފައެވެ. އެގޮތުން ހޯމަ ދުވަހުގެ ރެއާއި އަންގާރަ ދުވަހުގެ ރޭ މުޒާހަރާކޮށްފައިވާއިރު، މުޒާހަރާގެ ތެރެއިން ފުލުހުންގެ ގަޔަށް ކުޅުޖެހުން ފަދަ މުޑުދާރު އަމަލުތައް ހިންގަމުންދާކަމަށް ވެއެވެ.

އާއްމު ސިއްހަތު ރައްކާތެރިކުރުމުގެ ގާނޫނާއި، އެއްވެ އުޅުމުގެ މިނިވަންކަމުގެ ގާނޫނާ ހިލާފަށް، މާލޭގައި އިދިކޮޅު ސިޔާސީ ޕާޓީތަކުން މުޒާހަރާ ކުރަމުންދާއިރު، މިހާތަނަށް އިލެކްޝަންސް ކޮމިޝަނަކުން ބަހެއް ބުނެފައެއް ނުވެއެވެ. ސިޔާސީ ޕާޓީތަކުގެ ބެލެނިވެރި ފަރާތަކީ އިލެކްޝަންސް ކޮމިޝަނެވެ.

މީގެކުރިން، ވަރަށް ކުދިކުދި ކަންކަންކަމުގައި، ބޮޑެތި ނޫސްބަޔާންތަކާއި އިންޒާރުތައް ބައެއް ސިޔާސީ ޕާޓީތަކަށް އިލެކްޝަންސް ކޮމިޝަނުން ދެމުންދިޔަ އެވެ. އެގޮތުން އެމްޑީޕީއަށް ސިޔާސީ ހަރަކާތް ނުހިންގޭހާ ވަރަށް ކަންކަން ހަނިކުރަމުންދިޔަކަން ފާހަގަ ކުރެވިފައި ވެއެވެ.