ސޯޝަލް މީޑިއާ މެދުވެރިކޮށް އެކިކަހަލަ ކުށްތަކަށް އަރައިގަންނަ މީހުންގެ މައްސަލަތައްވެސް ގާތުން ބަލައި ފިޔަވަޅު އަޅުއްވާނެ ކަމަށް ކޮމިޝަނަރ އޮފް ޕޮލިސް (ސީޕީ) މުޙައްމަދު ހަމީދު ވިދާޅުވެއްޖެއެވެ.
ބުރާސްފަތި ދުވަހުގެރޭ ރާއްޖެޓީވީގެ "ފަލަސުރުޙީ" ޕްރޮގްރާމްގައި ވާހަކަ ދައްކަވަމުން ސީޕީ ހަމީދު ވިދާޅުވީ، ސޯޝަލް މީޑިއާގެ އެކި ޕްލެޓްފޯމްތައް މެދުވެރިކޮށް އެކިކަހަލަ ކުށްތަކަށް އަރައިގަންނަމުންދާ މީހުންގެ މައްސަލަތައްވެސް ފުލުހުން ގާތުން ބަލަމުންދާނެ ކަމަށެވެ. އެގޮތުން އެކަމުގައި ބޭރުގެ ޤާނޫނޫ ތަންފީޒުކުރާ އިދާރާތަކުގެ އެހީތެރިކަންވެސް ހޯދަމުންދާކަން ސީޕީ ފާހަގަ ކުރެއްވިއެވެ.
ސީޕީ ވިދާޅުވީ، އެފަދަ މައްސަލަތައް ބަލައި ތަހުޤީޤުކޮށް ދައުވާވެސް ކޮށްފައިވާނެ ކަމަށެވެ.
ޓްވިޓަރ ވިޔަސް، ފޭސްބުކް ވިޔަސް، އަޅުގަނޑުމެން ބޭރުގެ އެކިއެކި ލޯ އެންފޯސްމަންޓް އޭޖެންސީސްތަކާ ގުޅިގެން ޚާއްސަކޮށް ރައްޔިތަކަށް ނުވަތަ ރައްޔިތުންގެ ތެރެއިން ބަޔަކަށް ސީދާ ނުރައްކަލެއް ކުރިމަތި ކުރުވަފާނެ ފަދަ މޭރުމަކުން އެކްސްޕްރެސް ކުރާ ފަރާތްތައް، ސޯޝަލް މީޑިއާގައި ޕޯސްޓް ކުރާ ފަރާތްތަކުގެ މައްސަލަ މީގެ ކުރިން ބަލާފައިވެސް ހުންނާނެ، އެކަހަލަ އަމަލުތައް ދައްކުވައިދޭ ވީޑިއޯތަކާއި މަންޒަރުތަކުގެ މައްސަލަވެސް ބަލާފައި ހުންނާނެ، ފިޔަވަޅު އަޅާފައިވެސް ހުންނާނެ، ދައުވާވެސް ކޮށްފައި ހުންނާނެ،ސީޕީ މުޙައްމަދު ހަމީދު
ސީޕީ ހަމީދު އިތުރަށް ވިދާޅުވީ، ރައްޔިތަކަށް ސީދާ ގެއްލުމެއް ލިބޭނެފަދަ މޭރުމަކުން މީސްމީޑިއާގައި ޙިޔާލު ފާޅުކޮށް، ބިރުދެއްކުމާއި، ނަފްރަތު އުފައްދަން މަސައްކަތް ކުރުންފަދަ މައްސަލަތައް ފާހަގަވެފައިވާ ކަމަށެވެ. އަދި އެކަން ކުރާ އެތައް ބަޔަކު ދެނެގަނެވިފައިވާ ކަމަށާއި، ޤާނޫނީ އިމުގެ ތެރެއިން އަޅަންޖެހޭ ފިޔަވަޅު އަޅުއްވާނެ ކަމަށްވެސް ސީޕީ ވިދާޅުވިއެވެ.
ސޯޝަލް މީޑިއާއަކީ އަޅުގަނޑުމެން މޮނިޓަރ ކުރާ ތަނެއް، އެއީ ޓްވިޓަރ ވިޔަސް ފޭސްބުކް ވިޔަސް، އަޅުގަނޑުމެންނަށް އެނގޭ އަޅުގަނޑުމެން އައިޑެންޓިފައިވެސް ކޮށްފައި ހުންނާނެ ސޯޝަލް މީޑިއާގައި އެކި ފަރާތްތަކަށް މި ބިރުދައްކައި، ހޭޓް މެސެޖް ސްޕްރެޑްކޮށް، އެކަހަލަ ކޮންޓެންޓް މި ފަތުރަނީ ކޮން ބައެއްކަން އަޅުގަނޑުމެންނަށް އެނގޭ އެތައް ސަތޭކަ ބަޔަކު އެބަތިބި، އަޅުގަނޑުމެންނަށް އެނގޭ ކޮން ބައެއްކަން އެއީ، އެވަގުތަކު އެމީހަކު ހާމަކުރާ ހާމަ ކުރުމެއްގެ މައްޗަށް ބަލާފައި ނުވަތަ އެ ލިޔާ އެއްޗެއްގެ މައްޗަށް ބަލާފައި ޤާނޫނުގެ ތެރެއިން އެޅެން އޮންނަ ފިޔަވަޅު އަޅުގަނޑުމެން އަޅަން،ސީޕީ މުޙައްމަދު ހަމީދު
ސޯޝަލް މީޑިއާގެ އެކި ޕްލެޓްފޯމްތައް މެދުވެރިކޮށް މީހުންނަށް ފުރައްސާރަ ކުރުމާއި، ސައިބަރ-ބުލީންގެ އިތުރުން، މީހުންގެ އަބުރަށް އަރައިގަތުމާއި، ބިރުދެއްކުން ފަދަ މައްސަލަތައް މީގެ ކުރިންވެސް ފެންމަތިވެފައިވެއެވެ. އެފަދަ ކަންކަން ފުލުހުންވެސް ގާތުން ބަލައި، ޤާނޫނީ ފިޔަވަޅު އަޅަމުންދާކަމަށް ސީޕީ ވިދާޅުވިއެވެ.
