އަންނަ ޖުލައި މަހުގެ ހަތްވަނަ ދުވަހުން ފެށިގެން ޓޫރިސްޓުންނަށް ޔުނައިޓެޑް އަރަބް އެމިރޭޓްސް (ޔޫއޭއީ/ދުބާއީ) ހުޅުވާލާނެ ކަމަށް އެގައުމުން ބުނެފިއެވެ.

ކޮވިޑް-19 ފެތުރެމުންދާތީ، މީގެ ތިން މަސްދުވަސް ކުރިން ފަތުރުވެރިން އައުން މެދުކަނޑާލާފައިވާ، ދުބާއީ އަލުން ޓޫރިސްޓުންނަށް ހުޅުވާލަން ނިންމާފައިވަނީ އެގައުމުގެ ސުޕްރީމް ކޮމެޓީ އޮފް ކްރައިސަސް އެންޑް ޑިޒާސްޓަރ މެނޭޖްމަންޓުންނެވެ.

މީގެއިތުރުން، ދުބާއީން ވަނީ އެ ގައުމުގެ ރައްޔިތުންވެސް އަންގާރަ ދުވަހުން ފެށިގެން އެހެން ގައުމުތަކަށް ދަތުރު ކުރުމުގެ ހުއްދަ ދީފައެވެ.

ދުބާއީން ވަނީ އެގައުމަށް ޒިޔާރަތްކުރާ ޓޫރިސްޓުން އަމަލު ކުރާނެ ގޮތުގެ ގައިޑްލައިނެއް އާންމުކޮށްފައެވެ. އެގޮތުން ދުބާއީއަށް ދަތުރުކުރަން ބޭނުންވާ މީހުން، އެމީހާ ދުބާއީއަށް އަންނަ ދުވަހުގެ ހަތަރު ދުވަހުގެ ތެރޭގައި ހަދާފައިވާ ކޮވިޑް-19 ޓެސްޓްގެ، ނެގަޓިވް ކަމުގެ ސެޓްފިކެޓެއް އޮންނަން ޖެހެއެވެ. ނޫންނަމަ އެއަރޕޯޓުގައި ޓެސްޓް ކުރާގޮތަށް ވަނީ ހަމަޖައްސާފައެވެ. އަދި ޓެސްޓުން ކޮވިޑް-19އަށް ޕޮޒިޓިވް ވެއްޖެނަމަ 14 ދުވަހުގެ ކަރަންޓީނަށް އެމީހަކު ދާންޖެހެއެވެ.

މީގެއިތުރުން، ދުބާއީއަށް ދަތުރުކުރާ މީހުން އިންޓަރނޭޝަނަލް ހެލްތް އިންޝުއަރެންސް ޕެކޭޖެއް ނަގާފައިވުމާއި، މީހާގެ ތަފްސީލްތައް ހިމެނޭ މޮބައިލް އެޕްލިކޭޝަނެއް ޑައުންލޯޑް ކުރުން އަދި ހެލްތް ޑެކްލަރޭޝަން ފޯމެއްވެސް ފުރިހަމަ ކުރަންޖެހެ އެވެ.

ދުބާއީއަކީ ފަތުރުވެރިކަމުގެ ދުނިޔޭގެ އެންމެ މަޝްހޫރު މަންޒިލްތަކުގެ ތެރެއިން އެއް މަންޒިލެވެ. ހާއްސަކޮށް ވިޔަފާރިވެރިންގެ މެދުގައި ވަރަށް މަގުބޫލު މަންޒިލެކެވެ. ޔޫއޭއީގައި މިހާތަނަށް ކޮވިޑް-19އަށް ޕޮޒިޓިވް ވެފައިވަނީ 44،925 މީހެކެވެ. އަދި މިބަލީގައި 302 މީހަކު މަރުވެފައި ވެއެވެ.