ކޮވިޑް-19 އާއި ގުޅިގެން ބައެއް ގައުމުތަކަށް ދެވަނަ ރާޅެއް އައިސް ބައެއް ގައުމުތަކުގައި ދެވަނަ ޕީކެއް ފެންނަން ފަށާފައިވަ ދަނޑިވަޅެއްގައި، އެއީ ތަފާތު ދެ ކަންތައް ކަމަށް ޑަބްލިއުއެޗްއޯއިން ބުނެފިއެވެ.
ހުކުރު ދުވަހުގެރޭ ޑަބްލިއުއެޗްއޯއިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން، އެ ޖަމިއްޔާގެ އެގްޒެކެޓިވް ޑިރެކްޓަރ ޑރ. މައިކް ރަޔަން ވިދާޅުވީ މި ދެކަމަށް ވަކި މާނައެއް ނެތް ކަމަށާއި، ނަމަވެސް ދެ ކަމުގައިވެސް ތަފާތުތަކެއް އެބަހުރި ކަމަށެވެ.
ޑރ. ރަޔަން ވިދާޅުވި ދެވަނަ ރާޅެއްގައި ފެންނަ ކޭސްތައް މައްޗަށް ދިއުމަށްފަހު ވަރަށް ދަށަށް ދާނެ ކަމަށެވެ. އެގޮތުން ކޭސްތައް މަދުވެގެން ގޮސް ބައެއް ހާލަތުގައި ކޭސްތައް ނުފެންނަ ފަހަރުވެސް އަންނާނެ ކަމަށާއި، އަދި އެއާއި ވިދިގެން ބަލި ފެތުރުން ކުއްލި ގޮތަކަށް އިތުރުވެގެންދާނެ ކަމަށެވެ.
ނަމަވެސް ދެވަނަ ޕީކުގެ ކޮންސެޕްޓް ތަފާތު ކަމަށާއި، އެކަން ގިނަ ގައުމުތަކުން މިހާރު ކުރިމަތިލަމުންދާ ކަމަށެވެ. އެގޮތުން ފުރަތަމަ ރާޅުގެ ޕީކުން އަރައިގަނެވުނު ނަމަވެސް ބަލި ހުރި މިންވަރު ދަށް ނުވުމާއި، އެއްވަރެއްގައި ހިފަހެއްޓިފައި ހުރުމަށްފަހު ބަލި ފެތުރުން ދަށް ނުކުރެވޭ ކަމަށެވެ. އަދި ދުވަސްކޮޅެއްގެ ތެރޭގައި ދެވަނަ ޕީކާއި ކުރިމަތިލާން ޖެހޭ ކަމަށް ޑރ. ރަޔަން ވިދާޅުވިއެވެ. ދެވަނަ ޕީކްގައި ކޮމިއުނިޓީ ޓްރާންސްމިޝަން ބޮޑުވެގެންދާ ކަމަށްވެސް އޭނާ ފާހަގަކުރެއްވިއެވެ.
ޑރ. ރަޔަން ވިދާޅުވީ ފުރަތަމަ ރާޅުގެ ތެރޭގައި ދެވަނަ ޕީކެއްވެސް އައިސްދާނެ ކަމަށެވެ. އަދި ދެވަނަ ޕީކް ކަޑައްތުކުރަމުންދާ އިރު ދެވަނަ ރާޅު އައުންވެސް އެކަށީގެންވާ ކަމަށެވެ.
ދެވަނަ ޕީކެއް އައުން އެކަށީގެންވަނީ ބައްޔާ ދެކޮޅަށް އަޅާފައި ފިޔަވަޅުތަކާއި، އެއާއި ދެކޮޅަށް ކުރެވޭ މަސައްކަތްތަކާއި، ކޮންޓްރޯލް ކުރެވޭ މިންވަރުގެ މައްޗަށް ކަމަށްވެސް ޑރ. ރަޔަން ވިދާޅުވިއެވެ. އަދި ދެވަނަ ޕީކެއް އައުމުގެ މާނައަކީ ބަލި ފެތުރެމުންދަނީ އޭގެ މައްޗަށް ފުރިހަމައަށް ކޮންޓްރޯލް ނުކުރެވިވުމުން ކަމަށް ވެސް ޑރ. ރަޔަން ވިދާޅުވިއެވެ.
ޓެސްޓް ކުރުމާއި ގުޅޭ ގޮތުން ޑރ. ރަޔަން ވިދާޅުވީ ގައުމުތަކުން އެކަށީގެންވާ ރަނގަޅު މިނެއްގައި ޓެސްޓް ކުރަން ފެށުމުން ކޭސްތައް ފެންނަވަރު އިތުރުވެގެންދާނެ ކަމަށެވެ. އަދި އެއީ ދެވަނަ ރާޅުކަމެއް ނުވަތަ ދެވަނަ ޕީކް ކަމެއް ދެނެގަންނާނީ ބައެއް ކަންތައްތަކަށް ބެލުމަށްފަހުގައި ކަމަށެވެ.
އެގޮތުން ފަރުވާދެމުންދާ މީހުންގެ އަދަދާއި މަރުވާ މީހުންގެ އަދަދު އެ ދަނޑިވަޅުގައި ބެލުން މުހިންމު ކަމަށް ވެސް އޭނާ ވިދާޅުވިއެވެ. އަދި ހޮސްޕިޓަލުގައި ފަރުވާ ދެމުންދާ މީހުންގެ އަދަދު އިތުރުވެގެން ދިއުމަކީ ޓެސްޓްކުރުން އިތުރުވުމުގެ ސަބަބުންވާ ކަމެއް ނޫން ކަމަށް ވެސް ޑރ. ރަޔަން ވިދާޅުވިއެވެ.
މިކަންތައްތަކާއި އެއްވަރަށް ޓްރާންސްމިޝަން ދަށްވި ނަމަވެސް ކްލަސްޓާސް ތަކަށް ބެލުން މުހިންމު ކަމަށް ޑރ. ރަޔަން ވިދާޅުވިއެވެ. އަދި ބަލީގެ އެންމެ ދަށް ހިސާބަށް ދާ ހިސާބުން ކްލަސްޓާއެއް ފެނިއްޖެ ނަމަ، އެކަން ބަލަން ޖެހޭނެ ކަމަށާއި، އެކަން ސީރިއަސް ކަމެއްގެ ގޮތުގައި ބަލަން ޖެހޭނެކަމަށް އޭނާ ވިދާޅުވިއެވެ. އަދި އެއީ ދެވަނަ ޕީކަކުން ސަލާމަތްވެ ކޮމިއުނިޓީ ޓްރާންސްމިޝަން އިން ރައްކާތެރިވުމަށް ކުރެވޭނެ މުހިންމު ކަމެއް ކަމަށް ޑރ. ރަޔަން ވިދާޅުވިއެވެ.