ކޮވިޑް-19 ޖެހޭ މީހުންގެ ތެރެއިން ހާލުބޮޑުވާ މީހުންގެ ފުރާނަ ސަލާމަތްކުރުމަށް ކާމިޔާބު ފަރުވާއެއްގެ ގޮތުގައި ހޯދުނު ޑެކްސަމެތަސޯން ބުދަ ދުވަހުން ފެށިގެން ކޮވިޑުގެ ބަލި މީހުންނަށް ފަރުވާދޭން އިނގިރޭސިވިލާތުގައި ބޭނުންކުރަން ފަށައިފިއެވެ.
އިނގިރޭސިވިލާތުގެ މެޑިކަލް އޮފިސަރުން ވަނީ، ވީ އެންމެ އަވަހަކަށް އެ ބޭސް ބޭނުންކުރަން އަންގާފައެވެ. އެންޓި އިންފްލެމެޓަރީ ޑްރަގް ޑެކްސަމެތަސޯނަކީ ކޮވިޑަށް ފަރުވާދެވޭ ބޭހެއްތޯ ބަލަން އޮކްސްފޯޑް ޔުނިވާސިޓީން ކުރިޔަށް ގެންދިޔަ ޓްރަޔަލް ގައި 2000 ބަލި މީހަކަށް މި ބޭސް ވަނީ ދީފައެވެ. ހެޔޮ އަގަގެއްގައި ލިބޭ މި ބޭހުން ވެންޓިލޭޓަރުގައި ފަރުވާ ހޯދަމުންދާ ބަލި މީހުންގެ އަދަދު ދަށްކޮށްދެއެވެ.
ރިސާޗަރުން ބުނެފައިވާ ގޮތުން ކޮވިޑުގެ ބަލިމަޑުކަން ފެތުރެން ފެށި ދުވަސްވަރު އެ ބޭސް ބޭނުން ކުރެވުނުނަމަ 5000 މީހުންގެ ފުރާނަ ސަލާމަތް ކުރެވުނީސް ކަމަށެވެ. ޑެކްސަމެތަސޯން އަކީ ހެޔޮ އަގެއްގައި ލިބޭ ބޭހަކަށްވާތީ ފަގީރު ގައުމުތަކަށް މި ބޭސް ފަސޭހަކަމާއި އެކު ލިބިގެންދާނެއެވެ.
މި ބޭހަކީ ސްޓެރޮއިޑް ޑްރަގެއްގެ ގޮތުގައި ބޭނުންކުރަމުން އަންނަ ބޭހެކެވެ. 1960 ވަނަ އަހަރުން ބޭނުންކުރަމުން އައި މި ބޭހަކީ ވަރަށް ގިނަ ބަލިތަކަށް ބޭނުންކުރާ ބޭހެކެވެ. އެއީ ތަންތަން ދުޅަވުމާއި، ރިއުމަޓޮއިޑް އާތެރައިޓިސް އަދި ނޭވަހިއްލާ ބައްޔަށް ފަރުވާކުރުމަށް ބޭނުންކުރަމުން އަންނަ ބޭހެކެވެ.
ޑެކްސަމެތަސޯން ސަބަބުން ލޭގެ ބަލިތައް ހުންނަ މީހުންގެ ''ޕްލޭޓްލެޓް'' ތައް އެއް ހަމައެއްގައި ހިފަހައްޓާފައެވެ. އަދި މަރު ބަލިތަކަށް ފަރުވާކުރަމަށްވެސް ބޭނުންކުރާ ބޭހެކެވެ. ސިކުނޑީގެ ޓިއުމަރުގެ ވަށައިގެން އުފެދޭ ދުޅަ ކުޑަކުރުމަށް މި ބޭސް ބޭނުންކުރެއެވެ.
