ޔޫކްރެއިންގެ ރައީސްގެ އަނބިކަނބަލުން އަލީނާ ޒެލެންސްކާ ކޮވިޑް-19ށް ޕޮޒިޓިވްވުމާއި ގުޅިގެން ހޮސްޕިޓަލްގައި އެޑްމިޓްކޮށްގެން ފަރުވާދެމުންގެންދާ ކަމަށް އެގައުމުން ހާމަކޮށްފިއެވެ.

ޔޫކްރެއިންގެ ރައީސް އޮފީހުން ބުނީ އެކަމަނާގެ ހާލުކޮޅު ރަނގަޅު ކަމަށެވެ. އަދި އެގައުމުގެ ރައީސް ކޮވިޑް-19ށް ކުރެއްވި ޓެސްޓު ނެގެޓިވް ވެފައިވާ ކަމަށްވެސް ރައީސް އޮފީހުން ބުނެއެވެ.

މިދިޔަ ހަފުތާގައި ޒެލެންސްކާ ވަނީ ވައިރަހަށް ޕޮޒިޓިވްވެފައިވާ ކަމަށް ވިދާޅުވެފައެވެ. ނަމަވެސް ފިރިކަލުން އަދި ޔޫކްރެއިންގެ ރައީސް ވޮލޮޑޮމީރް ޒެލެންސްކީ އާއި ދެ ދަރިކަލުން ކޮވިޑް-19ށް ނެގެޓިވް ކަމަށްވެސް ވިދާޅުވި އެވެ. އެއާއެކު ރައީސްގެ ހުރިހާ ބައްދަލުވުންތަކެއް ވަނީ ކެންސަލް ކުރައްވާފައެވެ.

އަލީނާ ޒެލެންސްކާއަށް ކޮވިޑް-19 ގެ އަސަރު އެހާ ބޮޑަށް ނުކުރާ ކަމަށާއި، އޮކްސިޖަން ބޭނުންވެ ވަޑައިނުގަންނަވާ ކަމަށް ރައީސް އޮފީހުން ނެރެފައިވާ ބަޔާނެއްގައި ވަނީ ބުނެފައެވެ. އަލީނާ ވައިރަހަށް ޕޮޒިޓިވްވުމާއި ގުޅިގެން ވަނީ އައިސޮލޭޓްކޮށް، ކައިރިން މޮނިޓަރ ކުރަން ފަށާފައެވެ.

ކޮވިޑް-19 އާ ގުޅިގެން ޔޫކްރެއިން ލޮކްޑައުން ކޮށްފައިވަނީ މާޗު މަހުގެ މެދުތެރޭގައެވެ. އެއާއެކު އެގައުމުގައި ވައިރަސް ފެތުރުން ވަނީ ވަރަށް ބޮޑަށް ކޮންޓްރޯލްކޮށްފައެވެ. އަދި މެއި މަހުގެ ތެރޭގައި ލޮކްޑައުންގައި އަޅާފައިވާ ފިޔަވަޅުތަކަށް ވަނީ ލުއިތައް ދޭންފަށާފައެވެ. އެގޮތުން ރެސްޓޯރެންޓްތަކާއި ޖިމް އަދި ޕަބްލިކް ޓްރާންސްޕޯޓް ހުޅުވާލާފައިވާއިރު، ޖޫން މަހުގެ 15ން ފެށިގެން އެގައުމުން ވަނީ ފްލައިޓުތައް އުދުހެން ފަށާފައެވެ.

އެހެން ނަމަވެސް ފާއިތުވި ދުވަސްތަކުގައި އެގައުމުގައި ވަނީ ކޭސްތައް ފެންނަ މިންވަރު މައްޗަށް ޖެހިލާފައެވެ. ސަރުކާރުން ބުނެފައިވަނީ ވައިރަސް ފެތުރޭ މިންވަރު މައްޗަށް ޖެހިފައިވަނީ އާންމުން ވައިރަހުން ރައްކާތެރިވުމަށް އަޅަންޖެހޭ ފިޔަވަޅުތަކަށް ސަމާލުކަން ދޭންޖެހޭ މިންވަރަށް ސަމާލުކަން ނުދޭތީ ކަމަށެވެ.

ޖޫން މަހުގެ 16 ވަނަ ދުވަހާ ހަމައަށް ޔޫކްރެއިންގައި ވަނީ 32،476 (ތިރީސް ދެހާސް، ހަތަރުސަތޭކަ ހަތްދިހަ ހަ) މީހުން ވައިރަހަށް ޕޮޒިޓިވްވެފައެވެ. އަދި 912 (ނުވަސަތޭކަ ބާރަ) މީހުން ވަނީ މަރުވެފައެވެ.