ކޮވިޑް-19އާ ގުޅިގެން ރާއްޖޭގެ ފަތުރުވެރިކަން ހުއްޓިފައި އޮތުމަށްފަހު ޖުލައި މަހު އަލުން ފަތުރުވެރިކަން ހުޅުވާލާއިރު، ފަތުރުވެރިން ކަރަންޓީން ނުކުރާ ގޮތަށް ހަމަޖައްސައިފިއެވެ.

ޓޫރިޒަމް މިނިސްޓްރީން ބުދަ ދުވަހު އާންމު ކޮށްފައިވާ ވީޑިއޯގައި ބުނެފައިވާ ގޮތުގައި ފަތުރުވެރިކަން އަލުން ހުޅުވާލާއިރު، އިތުރު އެއްވެސް ޝަރުތަކާ ނުލައި އޮން އެރައިވަލް ވިސާ ލިބޭނެ ކަމަށެވެ. އަދި ފަތުރުވެރިން ކަރަންޓީނު ވާން ނުޖެހޭނެ ކަމަށެވެ.

އަލުން ހުޅުވާލުމަށް ތައްޔާރުވުމުގެ މަސައްކަތްތައް މިހާރު ކުރިއަށްދާއިރު، ކުރިއާ އަޅާބަލާއިރު ހުރިހާ ކަމެއްވެސް ނުވަތަ ހުރިހާ އިންތިޒާމެއް ވެސް ފުރިހަމަވާނެ ކަމަށް ޓޫރިޒަމް މިނިސްޓްރީން ބުނެއެވެ. އެގޮތުން ނިއު ނޯމަލްގައި ފަތުރުވެރިންނަށް ރާއްޖެއިން ހޫނު މަރުހަބާއެއް ކިޔާނެ ކަމަށާއި، ފަތުރުވެރިންގެ އަތުން އިތުރު އެއްވެސް ފީއެއް ނުނަގާނެ ކަމަށް މިނިސްޓްރީން ބުނެއެވެ. އަދި ކުރިއަށްވުރެ ރަނގަޅު ހޮލިޑޭ ޕެކޭޖްތައް ލިބޭނެ ކަމަށް އާންމު ކޮށްފައިވާ ވީޑިއޯގައި ބުނެފައިވެއެވެ.

އުންމީދީ ގިނަ މެސެޖްތަކާއެކު އާންމުކޮށްފައިވާ މިވީޑިއޯއަކީ ސެލްޓަވީގޯގެ މަޝްހޫރު ކުޅުންތެރިތަކެއްގެ ވީޑިއޯ މެސެޖުތަކެކެެވެ. ސެލްޓަވީގޯއަށް ކުޅޭ ބްރެޒިލްގެ ރަފީނިއާއާއި ސްޕެއިންގެ ޑެނިސް ސުއާރޭޒްއާއި ރަޝިޔާގެ ސްމޮލޯވް އަދި ސްޕެއިންގެ އަސްޕާސްގެ ބުނެފައިވަނީ ''ދަ ސަން ވިލް ރައިޒް އަގެއިން އިން ދަ މޯލްޑިވްސް" މިހެންނެވެ.

ރާއްޖެ އިޝްތިހާރު ކުރުމުގެ ޚާއްސަ މަސައްކަތުގެ ތެރެއިން މަޝްހޫރު ގިނަ ފަންނާނުން ބޭނުން ކޮށްގެން ޓޫރިޒަމް މިނިސްޓްރީން އަދި އެމްއެމްޕީއާރްސީން ދަނީ ގިނަ މަސައްކަތްތަކެއް ކުރަމުންނެވެ. ޖުލައި މަހު ފަތުރުވެރިކަން އަލުން ހުޅުވާނެކަން ހާމަކޮށްފައިވީ ނަމަވެސް ހުޅުވާލާނެ ވަކި ތާރީހެއް ހާމަކޮށްފައިނުވެއެވެ.

ކޮވިޑް-19 އާއި ގުޅިގެން ރައްކާތެރިވުމަށް އަޅަމުންދިޔަ ފިޔަވަޅުގެ ތެރެއިން ސަރުކާރުން ރާއްޖޭގެ ބޯޑަރުތައް ބޭރުގެ މީހުންނަށް ބަންދުކުރީ 24 މާޗް ގައެވެ.