އައު ޢާންމު ޙާލަތުގައި ކުށްވެރިންނާ ކުރިމަތިލުމުގައި ފުލުހުންވެސް އައު ގޮތްތަކެއް ހޯދަން ޖެހޭކަމަށް މިނިސްޓަރ އޮފް ހޯމް އެފެއަރޒް ޝައިޚް ޢިމްރާން ޢަބްދުﷲ ވިދާޅުވެއްޖެ އެވެ.
ބުރާސްފަތި ދުވަހުގެރޭ ޕީއެސްއެމްގެ "ރާއްޖެމިއަދު" ޕްރޮގުރާމުގައި ވާހަކަ ދައްކަވަމުން މިނިސްޓަރ ވިދާޅުވީ، ރައްޔިތުން ގޭގައި މަޑުކުރަން ޖެހުމާއި ގުޅިގެން މަގުމަތީގައި ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރުމާއި، ރައްޔިތުންނަށް ދޭންޖެހޭ ޚިދުމަތްތައް ދިނުމުގައި ފުލުހުންގެ މަސައްކަތްތައް އިތުރަށް ބުރަވެގެން ދިޔަ ކަމަށެވެ.
އޭގެ އިތުރުން، މާލެ އެއްކޮށް ފުރަބަންދަކަށް ދިއުމުން މާލޭގެ އެތެރޭގެ ޙަރަކާތްތައް މަޑުޖެހުމާއި ގުޅިގެން ޢާންމު ކުށްތައް މަދުވެގެން ދިޔަކަން ފާހަގަ ކުރައްވައި މިނިސްޓަރ ވިދާޅުވީ، މަސްތުވާތަކެއްޗާއި ގުޅުންހުރި ކުށްތަކާއި، ކުދި ވައްކަންތަކާއި، ފޭރުން ފަދަ ކުށްތައް މަދުވެގެން ދިޔަ ކަމަށެވެ. އެގޮތުން ލޮކްޑައުންގެ ފިޔަވަޅުތަކަށް މަޑުމަޑުން ލުއިދޭއިރު، އެކަންކަން އަލުން ފެށިގެން ދިއުމަކީ އެކަށީގެންވާ ކަމެއްކަމަށް މިނިސްޓަރ ވިދާޅުވި އެވެ.
މިނިސްޓަރ ވިދާޅުވީ، ލޮކްޑައުންގެ ފިޔަވަޅުތަކަށް ލުއިދީ އައު ޢާންމު ޙާލަތަށް ތައްޔާރުވާއިރު، ކުށްވެރިންނާ ކުރިމަތިލުމުގައި ވެސް ފުލުހުން އައު ގޮތްތަކެއް ހޯދަން ޖެހޭނެ ކަމަށެވެ. އަދި އެކަމަށް ފުލުހުން ދުރާލާ ތައްޔާރުވަމުން ދާކަން މިނިސްޓަރ ފާހަގަ ކުރެއްވި އެވެ. އެގޮތުން އެކަމުގައި ފުލުހުންގެ ސަލާމަތާއި ރައްކާތެރިކަން ކަށަވަރު ކުރުމަށްޓަކައި ކުރަންޖެހޭ ކަންކަމަށްވެސް ޚާއްސަ ސަމާލުކަމެއް ދެއްވާނެކަމަށް މިނިސްޓަރ ވިދާޅުވި އެވެ.
ނިއު ނޯރމަލްއަށް ދާއިރު އަޅުގަނޑުމެން އެބަޖެހޭ ކުށްތަކަށް އަރައިގަންނަ މީހުންނަށް ރައްކާތެރިކަމާއެކު ޑީލްކުރާނެ ގޮތްތައް ދެނެގަންނަން، އެހެންކަމުން ވަރަށް ބޮޑަށް ފުލުހުން ރައްކާތެރިވުމަށް ސަމާލުވެ ތިބެ، ކުށްތަކަށް އަރައިގަންނަ މީހުންނަށް ނުވަތަ ކުށުގެ ވެށީގައި އުޅޭ ފަރާތްތަކަށް ޑީލްކުރަން މި ޖެހެނީ ފުލުހުންގެ ސަލާމަތަށް ވަރަށް ބޮޑަށް ބަލައިގެންހޯމް މިނިސްޓަރ ޝެއިޙް ޢިމްރާން ޢަބްދުﷲ
އޭގެ އިތުރުން، ރާއްޖޭގެ ޖަލުތަކުގެ ޙާލަތަށް އަލިއަޅުވާލައްވައި މިނިސްޓަރ ވިދާޅުވީ، އައު އާންމު ޙާލަތުގައި ޖަލުތަކުގެ ޤައިދީން ކޯޓުތަކާއި، ޢާއިލީ ބައްދަލުވުންތަކުގެ އިތުރުން، ބޭސްފަރުވާއަށް ގެންދިއުމުގައި ޖަލުތަކަށް ވައިރަސް ނުފެތުރޭނެ ގޮތަކަށް ކަންކަން އިންތިޒާމު ކުރައްވާނެ ކަމަށެވެ. އެގޮތުން އެކަމަކީ މިވަގުތަށް ދިމާވެފައިވާ އެންމެ ބޮޑު ގޮންޖެހުންކަން ވެސް މިނިސްޓަރ ފާހަގަ ކުރެއްވި އެވެ.
މިނިސްޓަރ ވިދާޅުވީ، ޤައިދީން ބޭރަށް ނެރެންޖެހޭ ޙާލަތްތަކުގައި ވެސް އަނބުރާ ގެނައުމަށް ފަހު އެހެން ޤައިދީންނާ އެކުވުމުގެ ކުރިން ވަކި މުއްދަތެއްގައި އެހެން ޤައިދީންނާ ވަކިން އެކަހެރި ކުރުމާއި، ކޮވިޑް-19 ގެ ޢަލާމާތެއް ފެނިއްޖެނަމަވެސް ޤައިދީން އެކަހެރި ކުރާނެ އިންތިޒާމުތައް ހަމަޖައްސަވަމުން ގެންދަވާކަމަށް މިނިސްޓަރ ވިދާޅުވި އެވެ.
