ހިޔާ މަޝްރޫއުގެ 7000 ފްލެޓްތަކަށް ހޮވުނު ފަރާތްތަކުގެ ލިސްޓު ފައިނަލްކުރުމުގެ މަސައްކަތް ކުރަމުންދާކަމަށް ހައުސިންގް މިނިސްޓަރ އައިމިނަތު އާތިފާ ވިދާޅުވެއްޖެ އެވެ.
ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީގެ ބައްދަލުވުމުގައި ވާހަކަދައްކަވަމުން މިނިސްޓަރ ވިދާޅުވީ ރައީސުލްޖުމްހޫރިއްޔާ ވިދާޅުވެފައިވާފަދައިން މިއަހަރު ނިމުމުގެ ކުރިން ހިޔާ މަޝްރޫގެ ފްލެޓްތައް ހަވާލުކޮށް ނިންމުމަކީ މިނިސްޓްރީގެވެސް އަމާޒު ކަމަށެވެ.
7000 ފްލެޓަށް ހޮވުނު ފަރާތްތަކުގެ ލިސްޓް ފައިނަލް މަސައްކަތް ޖުލައި މަހުގެ ނިޔަލަށް ނިންމުމަށް ދަނީ މަސައްކަތްކުރަމުން. ފްލެޓްތައް ސެޕްޓެމްބަރަށް ނިންމާ އަމާޒަކީ ރައީސުލްޖުމްހޫރިއްޔާ ވިދާޅުވެފައި ވާފަދައިން މިއަހަރު ނިމުމުގެ ކުރިން ހިޔާ މަޝްރޫގެ ފްލެޓްތައް ހަވާލުކޮށް ނިންމުން.ހައުސިންގް މިނިސްޓަރ އައިމިނަތު އާތިފާ
މިނިސްޓަރ ވިދާޅުވީ މި މަޝްރޫއުއާއި ގުޅިގެން މިހާރު މިނިސްޓްރީން ދަނީ ފްލެޓް ލިބޭ ލިސްޓުގައި ތިބި މީހުންގެ އެހެން ބިމެއް ނުވަތަ އިމާރާތެއް އޮތްތޯ ބަލަމުން ކަމަށެވެ. އަދި ސަރުކާރުގެ އޮފީސްތައް ހުޅުވެން ވާއިރަށް އެ މަސައްކަތްތައް ނިންމާލެވޭނެ ކަމަށް ބެލެވޭ ކަމަށް މިނިސްޓަރު ވިދާޅުވި އެވެ. އާތިފާ ވިދާޅުވީ މިހާރު ކުރަމުންދަނީ ޑޭޓާތައް ޗެކްކުރުމަށްފަހު ކްރޮސް ޗެކް ކުރުމުގެ މަސައްކަތް ކަމަށެވެ.
ކުރީގެ ސަރުކާރުގައި އެ 7،000 ފްލެޓް ދޭން ނިންމާފައި އޮތީ އިންސާފުވެރިކޮށްތޯ ބެލުމުގެ މަސައްކަތް ކުރުމަށް ކޮމެޓީއެއްވެސް ވަނީ އެކުލަވާލާފައެވެ.
