އިންދިރާގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގެ ނެޝަނަލް ރެފަރެންސް ލެބޯރަޓަރީ ގައި ކޮވިޑް-19 ގެ 20،000 (ވިހި ހާސް) ޓެސްޓުކޮށްފި އެވެ.

އައިޖީއެމްއެޗުން ކޮށްފައިވާ ޓްވީޓެއްގައި ބުނީ، އެ ހޮސްޕިޓަލުން 20،000 ށްވުރެ ގިނަ ޕީސީއާރް ޓެސްޓު ހަދާފައިވާ ކަމަށެވެ. އެ މަސައްކަތް ކުރުމުގައި ހަރަކާތްތެރިވި ލެބް ޓެކްނިޝަނުންނަށް ހޮސްޕިޓަލުން ވަނީ ހާއްސަ ޝުކުރެއް އަދާކޮށްފަ އެވެ.

އެވަރޭޖްކޮށް އައިޖީއެމްއެޗުން ދުވާލެއްގެ މައްޗަށް 600 އާއި 700 އާ ދެމެދުގެ ޓެސްޓުހަދަ އެވެ.

ރާއްޖޭގައި ކޮވިޑް-19 އަށް ދުވާލެއްގެ މައްޗަށް 1100 ޓެސްޓު ކުރުމުގެ ކެޕޭސިޓީ އެބަހުރި ކަމަށް ހެލްތް މިނިސްޓަރު އަބްދުﷲ އަމީން ވަނީ ދާދި ފަހުން ބޭއްވި ނޫސްވެރިންގެ ބައްދަލުވުމެއްގައި ވިދާޅުވެފައެވެ. އެއީ އައިޖީއެމްއެޗް، ފުލުހުންގެ ފޮރެންސިކް ލެބޯރަޓަރީގެ އިތުރުން އޭޑީކޭއިން ކުރެވޭ ޓެސްޓުތަކާއި އެކު އެވެ.

އަމީން ވިދާޅުވެފައިވާ ގޮތުގައި ޓެސްޓު ކުރުމުގެ ކެޕޭސީޓީ އިތުރު ކުރަމުންދަނީ ލޮކްޑައުން އަށް ލުއިދޭ ފުރަތަމަ ފޭސް އަށް ބެލުމަށް ފަހު ކަމަށެވެ.