ކޮވިޑް-19 އާ ގުޅިގެން ފުރޮންޓް ލައިންގައި މަސައްކަތް ކުރާ މުމްބާއީ ފުލުހުންނަށް ސަލްމާން ޚާން ސެނިޓައިޒާ ހަދިޔާ ކޮށްފިއެވެ.
މަހާރާޝްތްރާގެ ޗީޕް މިނިސްޓަރ އުއްދާވް ތާކްރޭ ކުރައްވާފައިވާ ޓްވީޓްގައި ފްރޮންޓްލައިންގައި މަސައްކަތް ކުރާ މުމްބާއީ ފުލުހުންނަށް 100،000 (އެއްލައްކަ) ސެނިޓައިޒާ ފުޅި ހަދިޔާ ކުރުމާއި ގުޅިގެން ސަލްމާން ޚާން އަށް ވަނީ ޝުކުރު އަދާކުރައްވާފައެވެ.
ލޮކްޑައުންގެ ސަބަބުން ޕާންވެލްގައި ހުރި ފާރމްހައުސްގައި ތާށިވެފައި ހުރި ސަލްމާން ދަނީ ކޮވިޑް-19 އާ ގުޅިގެން ހާލުގައި ޖެހިފައިވާ މީހުންނަށް އެކި ގޮތްގޮތުން އެހީތެރިކަން ފޯރުކޮށްދެމުންނެވެ.
އެގޮތުން ސަލްމާން ވަނީ ފައިސާގެ އެހީއާއި ކާބޯތަކެތީގެ އެހީތެރިކަން ފޯރުކޮށްދީފައެވެ.
ސަލްމާންގެ މަސައްކަތްތަކަށް ބަލާއިރު މިދިޔަ އީދާއި ދިމާކޮށް ރިލީޒްކުރަން އުޅުނު ފިލްމް "ރާދޭ: ޔުއަރ މޯސްޓް ވޯންޓެޑް ބާއީ" ރިލީޒްކުރުން ވަނީ ފަސްކޮށްފައެވެ.
ނަމަވެސް މިއަހަރުވެސް އީދާ ދިމާކޮށް ސަލްމާން ވަނީ ފޭނުން ޚާއްސަކޮށް ލަވައެއް ރިލީޒްކޮށްފައެވެ. "ބާއީ ބާއީ" މި ލަވައަކީ ލޮކްޑައުންގެ ތެރޭގައި ސަލްމާން ރިލީޒްކުރި ތިން ވަނަ ލަވައެވެ.
