ކޮވިޑް-19 އަށް ވެކްސިނެއް އުފެއްދިއްޖެނަމަ ހަމަހަމައަށް ޤައުމުތަކަށް ފޯރުކޮށްދިނުމަށް ހެލްތް މިނިސްޓަރ އަބްދުﷲ އަމީން ގޮވާލައްވައިފިއެވެ.
ހުކުރު ދުވަހު ސްވިޒްލޭންޑްގެ ޖެނީވާގައި ވާރޗުއަލްކޮށް ބޭއްވުނު ސޮލިޑަރިޓީ ކޯލް ޓު އެކްޝަން ގައި ދިވެހިރާއްޖެ ތަމްސީލް ކުރައްވައި ވާހަކަފުޅު ދައްކަވަމުން މިނިސްޓަރ ވިދާޅުވީ، މި ވައިރަސްއަށް ފަރުވާއެއް ނުވަތަ ވެކްސިންއެއް ތައްޔާރު ކުރެވިއްޖެނަމަ، ތަރައްޤީ ވެފައިވާ ޤައުމުތަކާއި އެއްގޮތަށް ރާއްޖެފަދަ ތަރައްޤީ ވަމުންއަންނަ ޤައުމުތަކަށްވެސް އެ ފަރުވާއެއް ނުވަތަ ވެކްސިނެއް ލިބުން މުހިއްމު ކަމަށެވެ.
އެގޮތުން މި "ސޮލިޑަރިޓީ ކޯލް ޓު އެކްޝަން" ގައި ދިވެހިރާއްޖެއިން ބައިވެރި ވާނެކަން މިނިސްޓަރ ފާހަގަ ކުރެއްވިއެވެ.
މިނިސްޓަރ އިތުރަށް ވިދާޅުވީ، މިކަމުން އަރައިގަނެވޭނީ ޤައުމުތަކުގެ މެދުގައި އޮންނަ ގުޅުން ބަދަހިކޮށް އެއްޤައުމުން އަނެއް ޤައުމަށް އެހީތެރިކަން ފޯރުކޮށްދީގެން ކަމަށެވެ. އެގޮތުން މިނިސްޓަރ ވަނީ ރައްޔިތުންނަށް ފެންވަރު ރަނގަޅު ސިއްޙީ ޚިދުމަތް ފޯރުކޮށްދިނުމުގައި ދިމާވާ ގޮންޖެހުންތައްވެސް ފާހަގަ ކުރައްވާފައެވެ.
ހެލްތް މިނިސްޓްރީން ބުނީ، ސޮލިޑަރިޓީ ކޯލް ޓު އެކްޝަންއަކީ ކޮސްޓަރިކާއިން އިސްނަގައިގެން ޑަބްލިޔު.އެޗް.އޯއާއި އެކު ކޯވިޑް-19ގެ ކަންކަމުގައި ހެލްތް ޓެކްނޮލޮޖީގެ ގްލޯބަލް ރިސޯސް ޕޫލްއެއް އެކުލަވާލައި، ހުރިހާ ޤައުމުތަކަށް ލިބޭނެ ގޮތް ހެދުމަށް ގޮވާލާ ގޮވާލުމެއް ކަމަށެވެ.
މި ހަރަކާތުގައި މިހާތަނަށް 34 ޤައުމަކުން ބައިވެރި ވެފައިވާކަމަށް މިނިސްޓްރީން މައުލޫމާތުދެއެވެ.
