މާލޭ ސިޓީގެ ލޮކްޑައުންގެ ޙާލަތުގައި، މާލޭ ސިޓީގައި ވިޔަފާރިކުރުމާއި އާމްދަނީ ލިބޭ ޒާތުގެ ތަފާތު މަސައްކަތްތައް ކުރުމުގެ ހުއްދަ ހޯދުމަށް އެދި ފުރުސަތު ހުޅުވާލައިފި އެވެ.
މާލެ ސިޓީ ކައުންސިލުން ބުނީ ކޮވިޑް-19 އާއި ގުޅިގެން މާލޭ ސިޓީގެ ލޮކްޑައުންގެ ޙާލަތުގައި، މާލޭ ސިޓީގައި ވިޔަފާރިކުރުމާއި އާމްދަނީ ލިބޭ ޒާތުގެ ތަފާތު މަސައްކަތްތައް ކުރުމުގެ ހުއްދަ ހޯދުމަށް އެދި މާލޭ ސިޓީ ކައުންސިލަށް ހުށަހަޅާގޮތަށް ހަމަޖެހިފައިވާތީ، އެފަދަ ފަރާތްތަކުން ހުކުރު ދުވަހުން ފެށިގެން މާލޭ ސިޓީ ކައުންސިލަށް ހުށަހެޅުމަށް ފުރުޞަތު ހުޅުވާލާފައިވާ ކަމަށެވެ.
ސިޓީ ކައުންސިލަށް މިކަމަށް އެދި ހުށަހަޅާނީ މާލޭ ސިޓީކައުންސިލްގެ ވެބްސައިޓް ގައި މިކަމަށް ޚާއްޞަކުރެވިފައިވާ ފަސޭހަ ޕޯޓަލް މެދުވެރިކޮށް ކަމަށް ސިޓީި ކައުންސިލުން ބުނެ އެވެ.
ސިޓީ ކައުންސިލުން ބުނީ މި ޕޯޓަލް މެދުވެރިކޮށް ހުށަހަޅާއިރު ކަމާބެހޭ ހުރިހާ މައުލޫމާތު ފުރިހަމަކުރަން ޖެހޭނެ ކަމަށެވެ. އަދި ފުރިހަމަ ކުރަންޖެހޭ މަޢުލޫމާތު އެނގޭނެ ކަރުދާހެއް ވެބްސައިޓްގައި ހިމަނާފައިވާނެ ކަމަށެވެ. އަދި ހުއްދަ ހޯދުމަށް ލިސްޓްތައް ފޮނުވުމާ އަދި ކަމާބެހޭ ގޮތުން ކުރަންޖެހޭ މުޢާމަލާތްތައް ހިންގާނީ ރަސްމީ ބަންދު ދުވަސްތައް ފިޔަވައި ކޮންމެ ދުވަހެއްގެވެސް ހެނދުނު 09:00ން ހަވީރު 05:00ށް ކަމަށް ސިޓީ ކައުންސިލުން ބުނެ އެވެ.
ސިޓީ ކައުންސިލުން ބުނީ މިގަޑިތަކުގެ ފަހުން ހުށަހަޅާ ފަރާތްތަކަށް ހުއްދަ ދިނުމުގެ މަސައްކަތްތައް ހިނގާނީ ޖެހިގެން އަންނަ ދުވަހު ކަނޑައެޅިފައިވާ ވަގުތުގެތެރޭގައި ކަމަށެވެ. އަދި ކައުންސިލަށް ހުށަހަޅާ ފަރާތްތަކަށް ހުއްދަ ދޫކުރާނީ ފުލުހުން ކަމަށެވެ. މިކަމާއި ގުޅޭގޮތުން މަޢުލޫމާތު ސާފުކުރުމަށް ގުޅާނީ 3306719 ނަމްބަރ އަށް ހެނދުނު 09:00ން ހަވީރު 05:00ށް ދެމެދުގަ އެވެ.
ލޮކްޑައުންގެ ޙާލަތަށް އައި ބަދަލުތަކާގުޅިގެން މި ހުއްދަތަށް ދިނުމަށް ސިޓީ ކައުންސިލަށް ހުށަހެޅިއަސް ކުރިން ފުލުހުން ދޫކޮށްފައިވާ ހުއްދަތަށް އަދި ބާޠިލް ނުވާނެ ކަމަށް ވެސް ސިޓީ ކައުންސިލުން ބުނެ އެވެ.
