ހުޅުމާލެ މެޑިކަލް ފެސިލިޓީ ފުލް ކެޕޭސިޓީގައި ބޭނުންކުރާ އިރު 63 ޑޮކްޓަރުންނާއި 130 ނަރުހުން ހަރަކާތްތެރިވާނެ ކަމަށް އައިޖީއެމްއެޗްގެ މެޑިކަލް ޑިރެކްޓަރ ޑރ. އަލީ ނަޒީމް ވިދާޅުވެއްޖެއެވެ.
ބުދަ ދުވަހުގެ ރޭ ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ވާހަކަދައްކަވަމުން އައިޖީއެމްއެޗްގެ މެޑިކަލް ޑިރެކްޓަރ ޑރ. އަލީ ނަޒީމް ވިދާޅުވީ ހުޅުމާލެ ފެސިލިޓީގެ ބީ ބްލޮކްގައި އިން 68 ބެޑަށް މިވަގުތު ޓާގެޓްކުރާ އިރުގައި އެ ކެޕޭސިޓީގައި ރައުންޑް ހަދާ 3 ސްޕެޝަލިސްޓުން، އެގޮތުން ފިޒިޝަނުން ނުވަތަ ޕުލްމޮނަލަޖިސްޓުން ހިމެނޭނެ ކަމަށާއި، ޝިފްޓް ޑިއުޓީ އުސޫލުން 10 މެޑިކަލް އޮފިސަރުން އަދި 30 ނަރުހުން މަސައްކަތް ފަރުވާދިނުމުގައި މަސައްކަތް ކުރައްވާނެ ކަމަށެވެ.
ދެވަނަ ފޭސްއެއްގައި 68ށް ވުރެ ގިނަވަގެންދާނަމަ ބްލޮކް އޭގެ ގްރައުންޑް އަދި ފަސްޓް ފްލޯ ބޭނުންކުރަން ފަށާނަން. އެހިސާބަށް ދާއިރު 9 ސްޕެޝަލިސްޓުން 30 މެޑިކަލް އޮފިސަރުން އަދި 75 ނަރުހުން ބޭނުންކުރާނަން. 3 އަދި 4 ވަނަ ފްލޯއާ ހަމައަށްދާ އިރު ނުވަތަ ފުލް ކެޕެސީޓީގައި ބޭނުންކުރާ އިރު 13 ސްޕެޝަލިސްޓުން 50 މެޑިކަލް އޮފިސަރުން އަދި 130 ނަރުހުން ބައިވެރިވާނެ،އައިޖީއެމްއެޗްގެ މެޑިކަލް ޑިރެކްޓަރ ޑރ. އަލީ ނަޒީމް
މީގެ އިތުރުން ހުޅުމާލެ މެޑިކަލް ފެސިލިޓީ ހިންގުމުގައި ބައިވެރިވަނީ އައިޖީއެމްއެޗްއަކުން އެކަނި ނޫން ކަމަށާއި، އެޑްމިނިސްޓްރޭޓިވް އަދި މެނޭޖްމަންޓުގެ އިތުރުން ކްލިނިކަލް މެނޭޖްމަންޓުގެ ކަންކަމުގައި ހުޅުމާލެ ހޮސްޕިޓަލް ވެސް ބައިވެރިވާނެ ކަމަށް ޑރ. ނަޒީމް ވިދާޅުވި އެވެ.
ޓްރީޓޮޕްގައި މިހާތަނަށް އެއްފަހަރާ 15 މީހުންނަށް ވުރެ އިތުރަށް އެޑްމިޓް ކުރެވިފައި ނެތް. އެތަނުގެ 15 އައިސީޔޫ ބެޑާއި، 30 ޖެނެރަލް ބެޑް ހުރޭ. އެތަނަށް އައިޖީއެމްއެޗުން ނުޖެހޭ އެންގޭޖްވާން ޑޮކްޓަރުން ނުވަތަ ނަރުހުން. ނަމަވެސް 15 ބެޑަށްވުރެ އިތުރުވެގެންދާ ހިސާބުގައި އައިސީޔޫ ކެޕެސިޓީ އިތުރުވާނަމަ އައިޖީއެމްއެޗްގެ އެނެސްތެޓިސްޓުންނާއި، ފިޒިޝަނުން އަދި ޕަލްމޮނަލަޖިސްޓުން އަދި މެޑިކަލް އޮފިސަރުން ބައިވެރިވާނެ ޓްރީޓޮޕް ހޮސްޕިޓަލުގެ ފަންކްޝަންގައި،އައިޖީއެމްއެޗްގެ މެޑިކަލް ޑިރެކްޓަރ ޑރ. އަލީ ނަޒީމް
ޑރ. ނަޒީމް ވިދާޅުވީ ކޮމިއުނިޓީ ބޭސްޑް ފެސިލިޓީ އަދި ހޮސްޕިޓަލް ފެސިލިޓީ (ޑީއެޗް 11 ގެ 10 ބެޑް އައިސީޔުއާއެކު މިހާރު މިހާތަނަށް އެންގޭޖްވެފައި އެބަތިބި ފަރުކޮޅުފުށި އެޗްއައިއެޗް އެނބޫދޫ ކުޑަބަނޑޮސް މި ފެސިލިޓީތަކުގައި) ތިބި ޕޮޒިޓިވް ޕޭޝަންޓުންނާއެކު 14 ވަރަކަށް ފެސިލިޓީ އައިޖީއެމްއެޗުން މެނޭޖްކުރަމުންދާ ކަމަށެވެ. އަދި މިވަގުތުވެސް އައިޖިއެމްއެޗްގެ 50 މެޑިކަލް އޮފިސަރުންނާއި 120 ނަރުހުންނާއި 6 ސްޕެޝަލިސްޓުން މި ފެސިލިޓީތަކުގައި މަސައްކަތް ކުރައްވަމުން ގެންދަވާ ކަމަށް ޑރ. އަލީ ނަޒީމް ވިދާޅުވިއެވެ.
