ބޫޓާނުގެ ޚާރިޖީ ވަޒީރު ޑރ ޓަންޑި ޑޯރްޖީ އަށް ފޮރިން މިނިސްޓަރ އަބްދުﷲ ޝާހިދު މިއަދު ފޯނުން ގުޅުއްވައި، މަޝްވަރާކުރައްވައިފިއެވެ.
މި ފޯންކޯލްގައި ދެޤައުމުގެ މެދުގައި އޮންނަ ގާތް ގުޅުން ފާހަގަކުރައްވައި، ސިއްހީ ދާއިރާ، ފަތުރުވެރިކަމުގެ ދާއިރާ، އަދި މޫސުމީ ބަދަލުތަކާ ގުޅޭ ގޮތުން ދެޤައުމު ގުޅިގެން ކުރިއަށް އޮތްތަނުގައި މަސައްކަތްކުރުމާ ގުޅޭ ގޮތުން މިނިސްޓަރ ޝާހިދު ވާހަކަފުޅުދެއްކެވިއެވެ. އަދި ކޮވިޑް-19 އާ ދެކޮޅަށް ބޫޓާންގެ ސަރުކާރުން ކުރަމުންދާ މަސައްކަތަށް ތައުރީފްކުރެއްވިއެވެ.
މީގެއިތުރުންވެސް ބައިލޭޓަރަލް، ސަރަހައްދީ އަދި ބައިނަލްއަޤްވާމީ އެކިއެކި ކަންތައްތަކުގައި ދެޤައުމު ގުޅިގެން މަސައްކަތްކުރުމާ ބެހޭ ގޮތުން ދެ ވަޒީރުން މަޝްވަރާކުރެއްވިއެވެ.
މި ފޯން ކޯލްގައި ފޮރިން މިނިސްޓަރ އަބްދުﷲ ޝާހިދު ވަނީ ބޫޓާންގެ ޚާރިޖީ ވަޒީރަށް ފަސޭހަފުޅު ވަގުތެއްގައި ރާއްޖެއަށް ދަތުރުފުޅެއް ކުރެއްވުމަށް ދައުވަތު ދެއްވާފައެވެ.
