މާލެ ސިޓީގައި ހިންގަމުންދާ ލޮކްޑައުންގެ އަމުރާ ޚިލާފުވެގެން އަންގާރަ ދުވަހު އެކަނި ވެސް މާލެއިން 199 މީހަކު ޖޫރިމަނާ ކޮށްފި އެވެ.
ފުލުހުން ޢާންމުކޮށްފައިވާ ތަފާސް ހިސާބުތަކަށް ބަލާއިރު، އަންގާރަ ދުވަހު އެކަނި މާލެއިން 199 މީހުން، ހުޅުމާލެއިން 10 މީހުން އަދި ވިލިމާލެއިން އެކަކު ވަނީ ޖޫރިމަނާ ކޮށްފަ އެވެ. އަދި މިހާތަނަށް ޖުމުލަ 5657 މީހަކު ލޮކްޑައުންގެ އަމުރާއި ޚިލާފު ވެގެން ޖޫރިމަނާ ކޮށްފައިވާ ކަމަށް ފުލުހުން ބުނެއެވެ. އެއީ މާލެއިން 4923 މީހުން، ހުޅުމާލެއިން 630 މީހުން އަދި ވިލިމާލެއިން 104 މީހުންނެވެ.
ފުލުހުން ބުނީ ލޮކްޑައުންގެ އަމުރާ ޚިލާފުވެގެން މިހާތަނަށް މާލެއިން 313 މީހަކު ހައްޔަރު ކޮށްފައިވާ ކަމަށެވެ. އެއީ މާލެއިން 277 މީހުން، ހުޅުމާލެއިން 33 މީހުން އަދި ވިލިމާލެއިން 3 މީހުންނެވެ.
މީގެ އިތުރުން ފުލުހުން ބުނީ އަންގާރަ ދުވަހު އެކަނި ވެސް މާލެއިން 16 މީހުން ހައްޔަރު ކޮށްފައިވާ ކަމަށެވެ. އަދި ހުޅުމާލެއިން 3 މީހަކު ހައްޔަރު ކޮށްފައި ވާއިރު، ވިލިމާލެއިން މީހަކު ހައްޔަރު ކޮށްފައި ނުވާކަމަށް ފުލުހުން ބުނެއެވެ.
މާލެއިން ކޮވިޑް-19ގެ ކޭސްއެއް ފެނުމާ ގުޅިގެން މާލެސިޓީ ވަނީ ''ލޮކްޑައުން ކޮށްފަ އެވެ. މި ޙާލަތުގައި ޒަރޫރީ ބޭނުންތަކުގައި ބޭރަށް ނުކުމެ އުޅެން ޖެހެނީ ޚާއްޞަ ހުއްދައެއްގެ ދަށުންނެވެ.
