ކުއްލި އަލާމާތްތަކެއް ފެނި މިހާ ކުއްލި މަރަކުން މަރުވުން އެއީ ކޮވިޑް-19ގެ އާލާމާތެއް ނޫން ކަމަށް ހެލްތު ޕްރޮޓެކްޝަން އެޖެންސީގެ އެފިޑަމޮލޮޖިސްޓް ޑރ. އިބްރާހީމް އަފްޒަލް ވިދާޅުވެއްޖެއެވެ.

ޑރ. އަފްޒަލް މިހެން ވިދާޅުވެފައި މިވަނީ ހޭ ނެތިގެން މަގު މައްޗަށް ވެއްޓިފައި އޮތް ބަންގްލަދޭޝްގެ މީހަކު ހޯމަ ދުވަހުގެރޭ 22:40 ހާއިރު އައިޖީއެމްއެޗްއަށް ގެންދިޔައިރު މަރުވުމާ ގުޅިގެންނެވެ. އަދި އެމީހާ ވަނީ ކޮވިޑް-19ށް ޕޮޒިޓިވްވެފައިވެފައެވެ.

މި މަރާ ގުޅިގެން ކޮވިޑް-19 ޓާސްކްފޯހުގެ ތަރުޖަމާނު މަބްރޫކު ޢަޒީޒް ވިދާޅުވީ އެމީހާއަކީ ހިތުގެ ބަލި ހުންނަ މީހެއް ކަމަށެވެ.

އަންގާރަ ދުވަހުގެރޭ ނޭޝަނަލް އިމަރެޖެންސީ އޮޕަރޭޝަންސް ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ޑރ. އަފްޒަލް ވިދާޅުވީ ހަމަ ހުރެފަ ވަރަށް ކުއްލި އަލާމާތްތަކެއް ފެނިފަ މީހާ މަރުވުން, އެއީ މިބަލީގެ ސީރިއަސް ފައްތަރަށް ދިއުމުގެ ފެންނަ ސިނާރިއޯޯއެއް ނޫން ކަމަށެވެ.

ޑރ. އަފްޒަލް ވިދާޅުވީ ކޮވިޑް-19ގެ ނުރައްކާ ހާލަތަށް ދަނީ ދާއިމީ ބައްޔެއް ހުންނަ މީހަކު ވައިރަސްއަށް ޕޮޒިޓިވްވާ ހާލަތުގައި ކަމަށެވެ. ނަމަވެސް އަވަސް ގޮތެއްގައި ފަރުވާ ދެވިއްޖެކަމުވާ ނަމަ ސަލާމަތްވާކަން ޑރ. އަފްޒަލް ފާހަގަކުރެއްވިއެވެ.

ޑރ. އަފްޒަލް ވިދާޅުވީ މިހާލަތުގައި އަރިދަފުސް ރޯގާގެ އަލާމާތެއް ފެނިއްޖެކަމުގައިވާނަމަ އަވަހަށް ޑޮކްޓަރަށް ދައްކަން ޖެހޭ ކަމަށެވެ. އަދި ނޭވާލާން އުދަނގޫވާ ހިސާބުން މަޑުކޮށްގެން ނުވާނެ ކަމަށާއި، އެކަން އަވަހަށް ސަމާލުކަމަށް ގެންނަން ޖެހޭ ކަމަށް ޑރ. އަފްޒަލް ފާހަގަކުރެއްވިއެވެ.

ކޮވިޑް-19ގައި ނުރައްކާ ބޮޑީ ދާއިމީ ބައްޔަށް ބޭސްކުރާ މީހުންނާއި، އުމުރުން ދުވަސްވީ މީހުންގެ އިތުރުން ދިފާއީ ނިޒާމު ދަށް މީހުންނަށެވެ. މިފަދަ މީހުން ޚާއްސަ ސަމާލުކަމެއް ދޭން ޖެހޭކަން ކަމާ ބެހޭ ފަރާތްތަކުން އިލްތިމާސްކުރެއެވެ.