ކޮވިޑް-19ށް ޕޮޒިޓިވްވާ ޕޭޝަންޓަކު އައިސޮލޭޝަންއަށް ގެންދާއިރު، ގާތުގައި އެހީތެރިވުމަށް ހުންނަ މީހާއަކީ އެކަމަށް އެއާއިލާއަކުން އެދުމުން ދެވޭ ހުއްދައެއްގެ ދަށުން ހުންނަ މީހެއް ކަމަށް ހެލްތު ޕްރޮޓެކްޝަން އެޖެންސީގެ އެފިޑަމޮލޮޖިސްޓް ޑރ. އިބްރާހީމް އަފްޒަލް ވިދާޅުވެއްޖެއެވެ.
ކޮވިޑް-19ށް ޕޮޒިޓިވްވާ ހައިރިސްކް ކެޓަގަރީ ނުވަތަ އެހީތެރިކަން ބޭނުންވާ ފަދަ ފަރާތްތައް އައިސޮލޭޝަން ފެސިލިޓީތަކަށް ގެންދާއިރު، އާއިލާއިން އެހީތެރިވުމަށް މީހަކު ދިއުމަށް އެދޭނަމަ އެކަމުގެ ހުއްދަ ދަނީ ދެމުންނެވެ.
މިގޮތަށް ދެވޭ ހުއްދައާ ބެހޭ ގޮތުން އަންގާރަ ދުވަހުގެ ރޭ ނޭޝަނަލް އިމަރެޖެންސީ އޮޕަރޭޝަންސް ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ޑރ. އަފްޒަލް ވިދާޅުވީ މި ހުއްދަ ދެނީ ޚާއްސަ އުސޫލެއްގެ ތެރެއިން ކަމަށެވެ. އެގޮތުން މަންމަ، ބައްޕަ، ނުވަތަ ދަރިފުޅު އެހީތެރިކަން ބޭނުންވާ ހަލާތުގައި އަދި އެމީހުން ބައްޔަށް ޕޮޒިޓިވްވެފައިވާއިރު ވެސް ގާތުން މަސައްކަތް ކޮށްފައިވާ މީހަކަށްވާތީ ހުއްދަދޭ ކަމަށް ޑރ. އަފްޒަލް ވިދާޅުވިއެވެ. އަދި ވިދާޅުވީ އެއީ އެއާއިލާތަކުން އެކަމަށް އެދުމުންދެވޭ ހުއްދައެއް ކަމަށެވެ.
ބައެއް ކަހަލަ ސިޓުއޭޝަންގައި މިސާލަކަށް އެމީހެއްގެ ބައްޕަ ނުވަތަ މަންމަ ކަމުގައި ވެއްޖެއްޔާ އެމީހާއެކުގައި މިސާލަކަށް މަސައްކަތްކޮށްފަ އަދި ނެގެޓިވްވިޔަސް އެކުގައި ހުންނަން އެދިއްޖެ ހާލަތެއްގައި އެކަން އެގޮތަށް ކުރެވިދާނެ. އެކަހަލަ ގޮތަކަށް ކުރިއަށް ދަނީ. މާނައަކީ އެއީ އެއްވެސް އިރެއްގައި އަޅުގަނޑުމެން ސެލެކްޓް ކޮށްގެން ގެންދާ ބައެއް ނޫނޭ. އެހާލަތުގެ ގޮތުން އޯލްރެޑީ އެކްސްޕޯސް ވެފައި ތިބި ބަޔަކު އެބަލި މީހާ އެކު ކޮންޕެނީވާން އެދިގެން ގެންދާ ގެންދިއުމެއް. ވަރަށް ގާތުން މަސައްކަތް ކުރަމުން ދިޔާމަ.ހެލްތު ޕްރޮޓެކްޝަން އެޖެންސީގެ އެފިޑަމޮލޮޖިސްޓް ޑރ. އިބްރާހީމް އަފްޒަލް
ޑރ. އަފްޒަލް ވިދާޅުވީ އެހީތެރިވުމަށްދާ މީހުން ކޮވިޑް-19ށް ޓެސްޓް ކުރެވި ނަތީޖާ ނެގެޓިވްވުމާ ގުޅިގެން ސެޕްރޭޓް ކުރެވޭނެ ކަމަށެވެ. އަދި އުސޫލުގެ ތެރެއިން އެމީހުންނަށް ދޭންޖެހޭ ފަރުވާދޭނެކަން ޑރ. އަފްޒަލް ފާހަގަކުރެއްވިއެވެ.
