ލޮކްޑައުންގެ އަމުރާ ޚިލާފުވެގެން ހޯމަ ދުވަހު އެކަނި ވެސް މާލެއިން 12 މީހަކު ހައްޔަރުކޮށްފި އެވެ.

މާލެއިން 12 މީހުން ހައްޔަރުކޮށްފައި ވާއިރު، ހޯމަ ދުވަހު ހުޅުމާލެއާއި، ވިލިމާލެއިން މީހަކު ހައްޔަރު ކޮށްފައެއް ނުވެއެވެ. މިއާއެކު، މިހާތަނަށް ހައްޔަރު ކުރި މީހުންގެ ޖުމުލަ އަދަދު ވަނީ 294ށް އަރާފަ އެވެ.

ފުލުހުން ބުނީ ހޯމަ ދުވަހު މާލެ ސިޓީން 188 މީހަކު ލޮކްޑައުންގެ އަމުރާ ޚިލާފުވުމާ ގުޅިގެން ޖޫރިމަނާ ކޮށްފައިވާ ކަަމަށެވެ. އެގޮތުން މާލެއިން 171 މީހަކާއި، ހުޅުމާލެއިން 17 މީހަކު ޖޫރިމަނާ ކޮށްފައިވާ ކަމަށެވެ.

މީގެ އިތުރުން ފުލުހުން ބުނީ ލޮކްޑައުންގެ އަމުރާއި ޚިލާފުވުމާ ގުޅިގެން މިހާތަނަށް 5447 މީހަކު ޖޫރިމަނާކޮށްފައިވާ ކަމަށެވެ. އެއީ މާލެއިން 4724 މީހުން، ހުޅުމާލެއިން 620 އަދި ވިލިމާލެއިން 103 މީހުންނެވެ.

މާލެއިން ކޮވިޑް-19ގެ ކޭސްއެއް ފެނުމާ ގުޅިގެން މުޅި މާލެސިޓީ ލޮކްޑައުން ކުރީ އޭޕްރީލް މަހުގެ 15 ވަނަ ދުވަހު އެވެ. އަދި މިމަހުގެ 28ށް ލޮކްޑައުން ހަމަވާއިރު، ފޭސް އެކެއްގެ ލުއިތަކެއް ދިނުމަށް ސަރުކާރުން ނިންމާފައި ވެއެވެ.