މިހާރު ހިނގަމުންދާ ކައުންސިލްތަކުގެ ދައުރު ދިގު ދައްމާލުމާއި، ގުޅޭގޮތުން، ރައްޔިތުންގެ މަޖިލީހުގައި ވަރަށް ގިނަ ބަހުޘްތަކާއި މަޝްވަރާތައް ކުރެވިފައިވާ ކަމަށާއި، ނަމަވެސް މިހާތަނަށް މިކަމަށް އެއްބަސްވެވޭ ޙައްލެއް ހޯދާފައިވާ ކަމަށް ތުޅާދޫ ދާއިރާގެ މެންބަރު ޙިސާން ޙުސައިން ވިދާޅުވެއްޖެ އެވެ.

އަންގާރަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި، ޤާނޫނު ނަންބަރު 22/2019 (ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް 5 ވަނަ އިޞްލާޙު ގެނައުމުގެ ޤާނޫނު) އަށް އިޞްލާޙު ގެނައުމުގެ ބިލަށް ބަހުޘް ކުރައްވަމުން މަޝްހޫރު ޤާނޫނީ ވަކީލު ހިސާން ވިދާޅުވީ، ޤާނޫނުއަސާސީ އިޞްލާޙު ކުރުމަކީ އެންމެ ފަހު މަރުޙަލާގައި ކުރަންޖެހޭ ކަމެއް ކަމަށާއި އަދި އެހެން ގޮތަކުން ޙައްލެއް ނުލިބުނިއްޔާ ނޫނީ ޤާނޫނުއަސާސީ އިޞްލާޙު ކޮށްގެން ނުވާނެކަން ހުރިހާ މެންބަރުން ވެސް ޤަބޫލު ކުރައްވާ ކަމަށެވެ.

ހިސާން ވިދާޅުވީ، ޤާނޫނުއަސާސީ އިޞްލާޙު ނުކޮށް، ޤާނޫނުއަސާސީން މުއްދަތެއް ނުވަތަ ދައުރެއް ކަނޑައަޅާފައި އޮންނަކަމަކަށް، ޢާންމު ޤާނޫނަކުން ޙަހައްލެއް ހޯދޭނެ ކަމަށް ޤަބޫލު ނުކުރައްވާ ކަމަށެވެ.

އެހެންކަމުން، މަޖިލީހަށް ހުށަހެޅިފައިވާ ޤާނޫނުއަސާސީއަށް އިޞްލާޙު ގެނައުމުގެ ބިލު ފާސްކުރަން ތާޢީދު ކުރައްވާ ކަމަށް ހިސާން ވިދާޅުވި އެވެ.

މީގެ އިތުރުން ހިސާން ވިދާޅުވީ، މިހާރު ތިއްބެވި ކައުންސިލަރުންގެ ދައުރު ހަމަވެ، އިތުރަށް ތިއްބަވާނަމަ ދިމާވެދާނެ ކަންކަމާމެދު މަޖިލީހުގެ ގިނަ މެންބަރުންގެ ކަންބޮޑުވުންތައް މިމައުޟޫއަށް ބަހުޘް ކުރައްވަމުން ހިއްސާ ކުރައްވާފައިވާ ކަމަށެވެ. ހިސާން ވިދާޅުވީ، އެކަންކަމަށް ކޮންމެވެސް ވަރެއްގެ ޤާނޫނީ ޙައްލެއް، ހެންވޭރު ހުޅަނގު ދާއިރާގެ މެންބަރު ޙަސަން ލަޠީފް ހުށަހަޅުއްވާފައިވާ ޚާއްޞަ ބިލުން ލިބިގެންދާނެ ކަމަށެވެ.

ހިސާން ވިދާޅުވީ، "ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުން ކަށަވަރުކުރުމުގެ ޚާއްޞަ ބިލު 2020" ބިލު ދިރާސާ ކުރުމުގެ މަސައްކަތް މަޖިލީހުގެ ލާމަރުކަޒީ ކޮމެޓީން މިހާރު ނިންމާފައިވާ ކަމަށެވެ.

ޙަސަން ލަޠީފް ހުށަހެޅުއްވި، "ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުން ކަށަވަރުކުރުމުގެ ޚާއްޞަ ބިލު 2020" ބިލަކީ އާ ކައުންސިލަރުން އިންތިޚާބު ކުރެވެންދެން މިހާރު ތިއްބެވި ކައުންސިލްތައް ދެމިގެންދާގޮތަށް ފަރުމާކޮށްފައިވާ ބިލެކެވެ. އެބިލު ހުށަހެޅުނީ، ކޮވިޑް-19 އާ ގުޅިގެން ޢާންމު ޞިއްޙަތުގެ ނުރައްކަލުގެ ޙާލަތު އިޢުލާނު ކޮށްފައިވާ މިދަނޑިވަޅު ޤާނޫނުއަސާސީއަށް އިޞްލާޙު ގެންނަން ހުށަހަޅާފައި ވާތީ، އުފެދުނު ދެބަސްވުންތަކާ ގުޅިގެން ނެވެ.

އެޓަރނީ ޖެނެރަލް އިބްރާހީމް ރިފްޢަތު އަދި ރައްޔިތުންގެ މަޖިލީހުގެ ކައުސެލް ޖެނެރަލް ފާތިމަތު ފިލްޒާ ވެސް ލާމަރުކަޒީ ކޮމެޓީއަށް ލަފާ ދެއްވާފައި ވަނީ، ޤާނޫނު ނަންބަރު 22/2019 (ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 5 ވަނަ އިޞްލާޙު ގެނައުމުގެ ޤާނޫނު) ގެ 3 ވަނަ މާއްދާއިން ޤާނޫނުއަސާސީގެ 231 ވަނަ މާއްދާގެ (ނ)އަށް ގެނެސްފައިވާ އިޞްލާޙު ކަމަށްވާ ކައުންސިލްތަކުގެ އުމުރު 3 އަހަރުން 5 އަހަރަށް ބަދަލުކުރި ކުރުމަށް ރިޢާޔަތް ކުރާއިރު، އެ މާއްދާ އަށް ޢަމަލު ކުރެވޭނެ އުޞޫލު ކަނޑައަޅާދީފައި ވަނީ އެ ޤާނޫނުގެ 4 ވަނަ މާއްދާގަ އެވެ. މިގޮތުން ޤާނޫނުއަސާސީގެ 231 ވަނަ މާއްދާއަށް ގެނެސްފައިވާ ބަދަލުތަކާ އެއްގޮތްވާ ގޮތުގެމަތިން ކައުންސިލްތަކަށް މެންބަރުން ޢައްޔަނު ކުރަންވާނީ އެ ކައުންސިލްތަކަށް މެންބަރުން ޢައްޔަނުކުރަން ފެށި ތާރީޚު ކަމަށްވާ 8 ޑިސެންބަރު 2019ށް ފަހު، ދެން އެންމެ އަވަހަށް ބާއްވާ އިންތިޚާބެއްގައި ކަމަށް ބަޔާންކޮށްފައި ވާތީ، ޤާނޫނުއަސާސީއަށް 5 ވަނަ އިޞްލާޙު ގެނައުމުގެ ޤާނޫނުގެ 4 މާއްދާ އެފަދައިން އޮތްހާހިނދަކު، އެމާއްދާ އިޞްލާޙު ކުރުމަކާ ނުލައި މިހާރު 3 އަހަރަށް އިންތިޚާބު ކޮށްފައިވާ ކައުންސިލްތަކުގެ ދައުރު، ރައްޔިތުންގެ މަޖިލީހުން ފާސްކުރާ ޢާންމު ޤާނޫނަކުން އެއަށްވުރެ އިތުރު މުއްދަތަކަށް އިތުރު ކުރެވިދާނެ ކަމަކަށް ނުފެންނަ ކަމަށެވެ.