ހއ. އުލިގަމުގައި ބަނދަރުކުރާ ފަތުރުވެރިކަމުގެ އުޅަނދު ފަހަރުން، ކަސްޓަމްސްއިން ނަގާ ފީތަކަށާއި އަމަލުކުރާ އުޞޫލުތަކަށް ވަރަށްބޮޑެތި ލުއިފަސޭހަތަކެއް ގެނެސްފިއެވެ.

މި ހިނގާ މެއި މަހުގެ 23 ވަނަ ދުވަހު ކަސްޓަމްސްގެ އާންމު ގަވާއިދަށް އިސްލާހު ގެނެސް ގެޒެޓްގައި ޝާއިއުކޮށްފައިވާއިރު، އިސްލާޙު ކުރެވުނު ޤަވާއިދުގައި އުލިގަމުގައި ބަނދަރުކުރާ ޔޮޓް ފަހަރާއި ގުޅުންހުރި މުޙިއްމު އިސްލާޙީ ބަދަލުތަކުގެ ހިމެނެއެވެ. އެގޮތުން، ކަނޑައެޅޭ ވަކި ސައިޒެއްގެ އުޅަނދު ފަހަރަށް އިންވާޑް އަދި އައުޓްވާޑް ކްލިއަރެންސް ފީ ކުޑަކުރުމާއި، ޕްރޮވިޜަންގެ ބޭނުމަށް އަންނަ އުޅަނދު ފަހަރަށް އޭޖެންޓަކު ނެތި 7 ދުވަސްވަންދެން ބަނދަރުގައި އޮވެވުމާއި، އެޖެންޓަކު އައްޔަންނުކޮށް ރާއްޖެ އަންނަ މިފަދަ އުޅަނދުތަކަށް އޭޖެންޓުން އައްޔަނުކުރުމަށް އެކަށީގެންވާ ވަގުތުތަކެއް ދިނުން ހިިމެނެއެވެ.

މި ބަދަލާއެކު މިފަދަ އުޅަނދުފަހަރުން ކަސްޓަމްސް އިން ނަގާ ފީތައް 75 އިންސައްތަ ދަށްކުރެވިފައިވާއިރު، ޚާއްޞަގޮތެއްގައި އުލިގަމަށް ބަނދަރުކުރާ އުޅަނދުތައް އިތުރުކުރުމަށް، މިހާރު އަމަލުކުރާ އުޞޫލުތަކަށް ބޮޑެތި ލުއިފަސޭހަތަކެއް ވަނީ ލިބިފައެވެ.

މިކަމާއި ގުޅިގެން، މޯލްޑިވްސް އިންޓަގްރޭޓަޑް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްއައިޓީޑީސީ)ން ވެސް ވަނީ ބަޔާނެއް ނެރެފައެވެ.

އޭޖެންޓަކު ނެތި އަންނަ އުޅަނދު ފަހަރު:

ރާއްޖެ އަންނަ ފަތުރުވެރިކަމުގެ އުޅަނދު ފަހަރަށް އިންވާރޑް ކްލިއަރެންސް ދޭވަގުތުން ފެށިގެން އޭޖަންޓަކު ހަމަޖެއްސުމަށް 72 ގަޑިއިރުގެ މުހުލަތެއް ދިނުމަށް އިސްލާހުގައިވެއެވެ. އަދި 72 ގަޑިއިރުގެ ތެރޭގައި އޭޖަންޓަކު ހަމަނުޖައްސައިފިނަމަ، މި ޤަވާއިދުގެ 19 ވަނަ ބައިގައި ބަޔާންކޮށްފައިވާ ގޮތުގެ މަތީން، އެ އުޅަނދުގެ ވެރިފަރާތް ނުވަތަ މާސްޓަރު 5000 ރުފިޔާއިން ޖޫރިމަނާ ކުރެވޭނެއެވެ. އެ އުޅަނދަކަށް ރާއްޖެއިން ބޭރަށް ފުރައިގެން ދެވޭނީ މިގޮތުން ކުރެވޭ ޖޫރިމަނާގެ ފައިސާ، ކަސްޓަމްސް އަށް ދައްކައި ނިންމުމުންނެވެ.

ގެނެވުނު އިސްލާހުތަކުގެ ތެރޭގައި، ޕްރޮވިޜަންގެ ބޭނުމަށް (ކާބޯތަކެއްޗާއި، ތެލާއި ބޯފެން ފަދަތަކެތި އެރުވުމަށް) ރާއްޖެއަންނަ 15 މީޓަރަށް ވުރެ ކުޑަ، ފަތުރުވެރިކަމުގެ އުޅަނދު ފަހަރަށް އޭޖެންޓަކު ނެތި 7 ދުވަސް ވަންދެން، ކަސްޓަމްސް ހުއްދަކުރާ ސަރަހައްދެއްގައި ބަނދަރުކުރެވިދާނެއެވެ. (މިސާލަކަށް: އުލިގަން ބަނދަރު)

ކަނޑުމަގުން އަންނަ އުޅަނދުފަހަރުގެ މައުލޫމާތު ހުށަހެޅުން:

ރާއްޖެ އަންނަ، 15 މީޓަރަށްވުރެ ކުޑަ، ފަތުރުވެރިކަމުގެ އުޅަނދުފަހަރު، ރާއްޖެ އައުމުގެ 12 ގަޑިއިރު ކުރިން، އެސްޓިމޭޓަޑް ޓައިމް އޮފް އެރައިވަލް ހުށަނޭޅޭ ޙާލަތުގައި، އެސްޓިމޭޓަޑް ޓައިމް އޮފް އެރައިވަލް ހުށަނޭޅުނު ސަބަބު ބަޔާންކޮށް، ހުށަހަޅާ ލިޔުމާއެކު، ކްލިއަރެންސް ހޯދުމަށް އެދި ހުށަހަޅަންވާނެކަމަށް އިސްލާހުގައި ވެއެވެ. އުޅަނދުގެ އެސްޓިމޭޓަޑް ޓައިމް އޮފް އެރައިވަލްއަށް އަންނަ ބަދަލުތައް، ކަސްޓަމްސް އިން ކަނޑައަޅާ ވަސީލަތެއް މެދުވެރިކޮށް، ކަސްޓަމްސް އަށް އަންގަންޖެހެއެވެ. ކަނޑުމަގުން ރާއްޖެ އަންނަ 15 މީޓަރަށް ވުރެން ކުޑަ ފަތުރުވެރިކަމުގެ އުޅަނދުފަހަރަށް އިންވާރޑް އަދި އައުޓްވާރޑް ފީއެއްގެ ގޮތުގައި ނެގުމަށް ހަމަޖެހިފައިވަނީ މީގެކުރިން ނެގި 1000 ރުފިޔާގެ ބަދަލުގައި 250 ރުފިޔާއެވެ.

ނަމަވެސް، 15 މީޓަރަށްވުރެ ކުޑަ ފަތުރުވެރިކަމުގެ އުޅަނދުތައް ފިޔަވައި، ކަނޑުމަގުން އަންނަ އުޅަނދު ފަހަރަށް އިންވާޑް އަދި އައުޓްވާޑް ކްލިއަރެންސް ދިނުމުގެ ފީއަކަށް ނެގުމަށް ހަމަޖެހިފައިވަނި 1000 ރުފިޔާއެވެ. މިއީ އުލިގަމަށް އަންނަ އުޅަނދު ފަހަރަށްވުރެ ބޮޑަށް، ރާއްޖެއަށް ބަނދަރުކުރާ އާންމު އުޅަނދު ފަހަރާއި ގުޅުންހުރި މާއްދާއެކެވެ.

އުލިގަމުގައި ބަނދަރުކުރާ އުޅަނދު ފަހަރުން ނަގަމުން ގެންދިޔަ ފީތައް ކުއްލި ގޮތަކަށް ބޮޑުވުމުގެ ސަބަބުންނެ 2010 ވަނަ އަހަރުން ފެށިގެން ވަރަށް ބޮޑަށް މަދުވެގެން ގޮސްފައިވާއިރު މިކަމުގެ ސަބަބުން، އުލިގަމުގައި އާލާވަމުން ދިޔަ ޔޮޓް ޓުއަރިޒަމްއަށް ވަނީ ވަރަށް ބޮޑު ހީނަރުކަމެއް އައިސްފައެވެ. 2018 ވަނަ އަހަރުގެ ރިޔާސީ އިންތިޚާބުގެ ކެމްޕޭނުގައި ރައީސް ސޯލިހު އުލިގަމަށް ވަޑައިގެން، އުލިގަމު ރައްޔިތުންނަށް ވެވަޑައިގެންނެވި އެންމެ ބޮޑު އެއް ވަޢުދަކީ އުލިގަމަށް ބަނދަރުކުރާ އުޅަނދު ފަހަރުން ނަގާ ބޮޑެތި ފީތައް މުރާޖަޢާކުރެވި، އުލިގަމު ޔޮޓް ޓުއަރިޒަމަށް އަލުން ދިރުން ގެނެސްދެއްވާނެކަމުގެ އުފާވެރި ވަޢުދެވެ.

ރައީސުލްޖުމްހޫރިއްޔާގެ ވަޢުދު ފުއްދެވުމަށްޓަކައި، އެމްއައިޓީޑީސީ އާއި މޯލްޑިވްސް ކަސްޓަމްސް ސަރވިސް އިސްނަގައިގެން، 2020 ޖެނުއަރީ 30 ވަނަ ދުވަހު، އުލިގަމު ޔޮޓް ފަހަރާއި ގުޅުންހުރި ހުރިހާ ދާއިރާގެ ބޭފުޅުންނާއެކު، ވަނީ މަހާސިންތާއެއް ބާއްވާފައެވެ. އެގޮތުން މި މަހާސިންތާގައި މިހާރު އުލިގަމު ގައި ބަނދަރުކުރާ އުޅަނދު ފަހަރުންނަގާ ބޮޑެތި ފީތައް ކުޑަކުރުމާއި ބެހޭ ގޮތުން ހުރިހާ ފަރާތްތަކުން ވަރަށް ފުޅާ ދާއިރާއެއްގައި މަޝްވަރާކޮށްފައިވާއިރު، ހުރިހާ ފަރާތްތަކުންވެސް ކަނޑައެޅޭ ވަކި ތާވަލަކާ އެއްގޮތްވާ ގޮތުގެ މަތީން، ފީތައް މުރާޖަޢާކުރާނެ ކަމުގެ އެއްބަސްވުމާއެކު ވަނީ މަހާސިންތާ ނިންމާލާފައެވެ.

އެމްއައިޓީޑީސީއަކީ ދިވެހިރާއްޖޭގެ ކުދި އަދި މެދު ފަންތީގެ ފަތުރުވެރިކަމުގެ ސިނާޢަތު ކުރިއަރުވާ ތަރައްޤީކޮށް، އަދި އެ ސިނާޢަތަށް ބޭނުންވާ އެހީތެރިކަން ފޯރުކޮށްދިނުމަށް އުފައްދާފައިވާ ސަރުކާރުގެ ކުންފުންޏެކެވެ. އެ ކޯޕަރޭޝަނުން ވަނީ، އުލިގަމު ފަދަ ލޯކަލް ޓޫރިޒަމް އާ ގުޅުންހުރި ޔޮޓް ޓޫރިޒަމް ސިނާޢަތު އިތުރަށް ފުޅާކޮށް ކުރިއެރުވުމަށްޓަކައި ކުރެވެން ހުރި ހުރިހާ މަސައްކަތްތަކެއް ދިރާސާކޮށް، އެމަސައްކަތްތައް އަމަލީ ގޮތުން ތަންފީޒު ކުރުމަށް މަސައްކަތް ކުރާނެކަމުގެ ޔަގީންކަން އަރުވާފައެވެ.