ކޮވިޑް 19 ގެ ސަބަބުން ރެޑް އެލަރޓަށް ގެނެސްފައިވާ 10 ރަށެއްގެ 390 ކުޑަކުދިންނާއި އެކުދިންގެ އާއިލާތަކަށް އެޑްވޮކޭޓިންގ ދަ ރައިޓްސް އޮފްޗިލްޑްރަން (އާރކް) އިން ކާބޯތަކެތި ފޯރުކޮށްދީފި އެވެ.

އާރކުން ބުނީ ކޮވިޑް-19 ގެ ބަލިމަޑުކަމުގެ ސަބަބުން ނޭދެވޭ އަސަރުކޮށްފައިވާ ކުޑަކުދިންނާއި އާއިލާތަކަށް އެހީތެރިވެދިނުމަށް އާރކްގެ ފަރާތުން "އާރކް އެއިޑް" ގެ ނަމުގައި ފަށާފައިވާ ޚާއްސަ ޕްރޮގުރާމް މެދުވެރިކޮށް 5 އަތޮޅެއްގެ 10 ރަށެއްގެ 382 ކުދިންނާއި އެކުދިންގެ ޢާއިލާތަކަށް ކާބޯތަކެތި ފޯރުކޮށްދީފައިވާ ކަމަށެވެ.

އާރކުން ބުނީ ކޮވިޑް-19 ގެ ސަބަބުން އެކަނިވެރި މައިންނާއި، ބަފައިން އަދި ނުކުޅެދުންތެރިކަން ހުންނަ ކުޑަކުދިން ހިމެނޭ އާއިލާތަކަށް ވަކިން ބޮޑަށް އަސަރުކޮށްފައި ވާއިރު، ބައެއް އާއިލާތަކަށް އާމްދަނީ ލިބޭނެ މަގު ބަންދުވެ، އިގްތިސާދީ ދަތިކަން އިހްސާސް ކުރަންޖެހިފައިވާ ކަމަށެވެ.

އާރކުން ގަބޫލުކުރާ ގޮތުގައި މިފަދަ ބަލިމަޑު ހާލަތެއްގައި ވެސް، ރަނގަޅު ކާނާ ލިބުމުގެ ހައްގުން އެއްވެސް ކުޑަ ކުއްޖަކު މަހްރޫމްވެގެން ނުވާނެ ކަމަށް އެޖަމްއިއްޔާއިން ބުނެއެވެ. އެހެންކަމުން "އާރކް އެއިޑް ގާއިމުކޮށްފައި ވަނީ ކޮވިޑް-19 ގެ ސަބަބުން އަސަރުކޮށްފައިވާ އާއިލާތަކަށް ކޮންމެވެސް މިންވަރެއްގެ ލުޔެއް ފޯރުކޮށްދިނުމަށް ކަމަށް ޢާރކުން ބުނެއެވެ.

އާރކް އެއިޑްގެ ދަށުން، 382 އަށް ވުރެ ގިނަ ކުޑަކުދިންނާއި އެ ކުދިންގެ އާއިލާތަކަށް ކާބޯތަކެތި ފޯރުކޮށްދީފައި ވާއިރު، މީގެ ތެރޭގައި އެކަނިވެރި މައިންބަފައިން ހިމެނޭ އާއިލާތަކާއި ނުކުޅެދުންތެރިކަން ހުންނަ ކުދިން ހިމެނެއެވެ.

މިހާތަނަށް ކާބޯކަތެއްޗާއި، ޕެކޭޖްތައް ފޯރުކޮށްދީފައި ވަނީ މާލެ ސަރަހައްދުގައި 144 ކުޑަކުދިންނާއި އެ ކުދިންގެ އާއިލާތަކަށް، ހދ. ކުޅުދުއްފުށީގައި 54 ކުޑަކުދިންނާއި އެ ކުދިންގެ އާއިލާތަކަށް، ނ. ނަރޫދޫގައި 14 ކުޑަކުދިންނާއި އެ ކުދިންގެ އާއިލާތަކަށް ހއ. ތަކަންދޫގައި 2 ކުޑަކުދިންނާއި އެ ކުދިންގެ އާއިލާތަކަށް، ހއ. އުލިގަމުގައި 9 ކުޑަކުދިންނާއި އެ ކުދިންގެ އާއިލާތަކަށް، ށ. މާއުނގޫދޫގައި 14 ކުޑަކުދިންނާއި އެ ކުދިންގެ އާއިލާތަކަށް، ނ. މަނަދޫގައި 31 ކުޑަކުދިންނާއި އެ ކުދިންގެ އާއިލާތަކަށް، ކ.ތުލުސްދޫގައި 33 ކުޑަކުދިންނާއި އެކުދިންގެ އާއިލާތަކަށް، ކ.ހިންމަފުށީގައި 30 ކުޑަކުދިންނާއި އެ ކުދިންގެ އާއިލާތަކަށް އަދި ށ.މިލަންދޫގައި 55 ކުޑަކުދިންނާއި އެ ކުދިންގެ އާއިލާތަކަށެވެ.

އާރކް އެއިޑްގެ ދަށުން ހަމަޖައްސައިދޭ އަސާސީ ކާބޯތަކެތީގެ ތެރޭގައި ހަނޑޫ، ފުށް، މުގު، ކިރު، މަސް ދަޅާއި ބިހުގެ އިތުރުން ބައެއް ދަޅު ހިމެނެއެވެ. އަދި ސަރުކާރުގެ ކަމާބެހޭ ފަރާތްތަކާއި، ލޯކަލް ކައުންސިލްތަކާއި މަދަނީ ޖަމިއްޔާތަކުން ކާބޯތަކެތީގެ އެހީތެރިކަމަށް ބޭނުންވާ ކަމަށް ފާހަގަކޮށްފައިވާ އާއިލާތަކުގެ ތެރެއިން ކުޑަކުދިން ހިމެނޭ ހުރިހާ އާއިލާތަކަށް އާރކް މެދުވެރިކޮށް އެހީތެރިކަން ފޯރުކޮށްދެ އެވެ.

އާރކް ހިންގުމަށް އެހީތެރިވެދޭ އެންމެ މުހިންމު ޕާރޓްނަރުންނަކީ ޔުނިސެފް އާއި ދިރާގު އަދި ބޭންކް އޮފް މޯލްޑިވްސް އެވެ. އަދި އާރކްގެ ޕާރޓްނަރުންންގެ އިތުރުން މުޖުތަމައުގެ އަމިއްލަ ފަރުދުން މިހައްސާސް ދަނޑިވަޅުގައި ވެސް އާރކް އެއިޑަށް ދެއްވަމުން ގެންދަވާ ދީލަތި އެހީ ފާހަގަކޮށް، ރާއްޖޭގައި ކުޑަކުދިންގެ ހައްގުތައް ހިމާޔަތްކޮށް، ކުރިއެރުވުމަށް އާރކް އިން ކެނޑިނޭޅި މަސައްކަތްކުރާނެކަމުގެ ޔަގީންކަން ދީފައި ވެއެވެ.