ރާއްޖެއިން ކޮވިޑް-19 ޖެހިގެން ރަނގަޅުވި މީހުންގެ އަދަދު 74ށް އަރައިފި އެވެ.

ހޯމަ ދުވަހުގެރޭ ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒް ވިދާޅުވީ، މިހާތަނަށް ރާއްޖެއިން މި ބަލި ޖެހިގެން ރަނގަޅު މީހުންގެ އަދަދު 74ށް އަރާފައިވާ ކަމަށެވެ.

މިހާތަނަށް ރާއްޖެއިން 74 މީހަކު ބަލިން ރަނގަޅު ވެފައިވާއިރު، މީގެތެރޭގައި ގިނައީ ދިވެހިންނެވެ. އަދި މި އަދަދުގެ ތެރޭގައި ރާއްޖޭގެ ރިސޯޓްތަކުން މި ބަލި ފެނުނުއިރު ފާހަގަކުރެވުނު ބިދޭސީން ވެސް ހިމެނެ އެވެ.

ރާއްޖޭގައި މީހުން ރިކަވަރވާން ނަގާ ދުވަސްތައް ހީކުރި ވަރަށްވުރެ، އިތުރު ކަމަށް އެޗްޕީއޭ އިން ވަނީ ހާމަކޮށްފަ އެވެ. އަދި އެހެން މެދުވެރިވަނީ ކީއްވެގެންކަން ދެނެގަންނަން މަސައްކަތްކުރާއިރު، ރާއްޖެއިން މިހާތަނަށް ރިކަވަރވެފައިވާ ފަރާތްތައް ބަލިން ފަސޭހަވެފައިވަނީ އެވަރެޖްކޮށް 17 ދުވަހުގެ ތެރޭގައި އެވެ.

އޭގެ އިތުރުން، ރާއްޖެއިން ޕޮޒިޓިވްވި މީހުންގެ އަދަދުވެސް މިހާރު ވަނީ 1106ށް އަރާފަ އެވެ.