ކޮވިޑް-19 އާއި ގުޅިގެން މާލީ ދަތިތައް ދިމާވެފައިވާ ކަސްޓަމަރުންގެ ބިލު ނުދެއްކޭ ޙާލަތުގައި، ކަސްޓަމަރުންނަށް ލުއިގޮތްތަކެއް ދިރާގުން ހަމަޖައްސައިދީފިއެވެ.

ދިރާގުން ބުނީ މިއީ ކޮވިޑް-19 އާ ގުޅިގެން ދިމާވެފައިވާ އުނދަގޫ ހާލަތުގައި ސަރުކާރާއި ރައްޔިތުންނަށް އެހީތެރިވުމަށް ދިރާގުން ކުރަމުންދާ މަސައްކަތެއް ކަމަށެވެ.

ދިރާގުން ބުނީ ފާއިތުވެދިޔަ މަސްތަކުގައި ކޮވިޑް-19 ބަލިމަޑުކަމާއި ގުޅިގެން މުޖުތަމަޢަށް ކުރިމަތިވަމުންދާ ދަތިތަކާއި މައްސަލަތަކަށް ލުއިފަސޭހަ ގޮތްތަށް ހޯދާ ދިނުމުގައި އެ ކުންފުނިން ކެނޑި ނޭޅި މަސައްކަތް ކުރަމުންދާ ކަމަށެވެ.

ދިރާގުން މި ލުއިތައް ދޭން ނިންމާފައިވާއިރު އެ ކުންފުނިން ވަނީ ދާދި ފަހުން 75 ރުފިޔާއަށް 3 ޖީބީގެ ޑޭޓާ ލިބޭ ވެލިއު ޕެކެއް ވެސް ތައާރަފު ކޮށްފައެވެ. މި ޕެކް ތައާރަފު ކުރަމުން ދިރާގުން ބުނީ މި ޕެކޭޖަކީ ރަމަޟާން މަހަށް ޚާއްޞަ ކޮށްގެން ތަޢާރަފު ކުރި ޕޭކޭޖެއް ކަމަށެވެ. އަދި، ކޮވިޑް-19އާ ގުޅިގެން ކަސްޓަމަރުންނަށް ލުއި ގޮތްތަކެއް ހަދައި ދިނުމަކީ މައިގަނޑު ޢަމާޒު ކަމަށް ދިރާގުން ބުންޏެވެ.

ކޮވިޑް-19 ފެތުރެމުންދާ މި ދަނޑިވަޅުގައި ގިނަ ބަޔަކު ޑޭޓާ ބޭނުން ކުރާކަން ފާހަގަކޮށް ދިރާގުން ބުނީ ކަސްޓަމަރުންނަށް ލުއި ގޮތްތަކެއް ހަމަޖައްސައި ދިނުމަށް ޕްރީޕެއިޑް ކަސްޓަމަރުންނަށް %50 އިތުރު ޑޭޓާ ލިބޭނެ ގޮތް ހަމަޖައްސާފައިވާ ކަމަށެވެ.

ކޮވިޑް-19ގެ ސަބަބުން މާލެސިޓީ ފުރަބަންދުކުރުމާއެކު މީހުން މުއާޞަލާތުކޮށް އިންޓަނެޓުގެ ބޭނުން ހިފުންވަނީ ވަރަށް ބޮޑަށް އިތުރުވެފައެވެ. އަދި އިންޓަނެޓް އަގުހެޔޮ ކޮށްދިނުމަށް ގިނަ ބަޔަކު އެދެމުން ވެސްދެއެވެ.