ކޮވިޑް-19 އާއި ގުޅިގެން މާލީ ދަތިތައް ދިމާވެފައިވާ ކަސްޓަމަރުންގެ ބިލު ނުދެއްކޭ ޙާލަތުގައި، ކަސްޓަމަރުންނަށް ލުއިގޮތްތަކެއް އުރީދޫން ހަމަޖައްސައިދީފި އެވެ.
އުރީދޫން ބުނީ ދިވެހި ރައްޔިތުންނަށް ކޮވިޑް-19އާއި ގުޅިގެން ކުރިމަތިވެފައިވާ މާލީ ދަތިކަމުގައި އެހީތެރިވުމަށް ސަރުކާރުން ކުރައްވަމުން ގެންދަވާ މަސައްކަތަށް އެއްބާރުލުން ދިނުމުގެ ގޮތުން، އުރީދޫ މޯލްޑިވްސްއިން ކަސްޓަމަރުންނަށް ބިލު ދައްކަން ލުއިފަސޭހަކޮށްދިނުމަށް ޚާއްޞަ ފުރުޞަތުތަކެއް ފަހިކޮށްދީފައިވާކަމަށެވެ.
އޭގެތެރޭގައި ހިމެނެނީ:
- ބިލައް ފައިސާ ދެއްކުމުގައި ދަތިތަށް ކުރިމަތިވެފައިވާނަމަ، ފައިސާ ދެއްކުމުގެ މުއްދަތު ބިލު ތައްޔާރުކުރާ ދުވަހުންފެށިގެން ދެމަސް ދުވަހަށް އިތުރުކުމަށް އެދިލެއްވުމުން، އުރީދޫގެ ކޮންމެ ކަސްޓަމަރަކަށްވެސް މި އެހީތެރިކަން ފޯރުކޮށްދެވޭނެ.
- މި ދަނޑިވަޅުގައި މާލީ ދަތިކަން ކުރިމަތިވެފައިވާ ކަސްޓަމަރުންނަށް، ބިލަށް ފައިސާ ދެއްކުމުގެ ޕްލޭންތަކާއި އެހެނިހެން ލުއިފަސޭހަކަން ރިކުއެސްޓްކޮއްލުމުން ހަމަޖައްސައިދެވޭނެ.
- ކޮވިޑް-19 އާއި ގުޅިގެން ދިމާވި ކަންކަމުގައި ވަޒީފާ ގެއްލުނުކަމަށް ރަޖިސްޓްރީ ކުރެވިފައިވާ ފަރާތްތަކަށް، އެކަމަށް ޙައްލެއް ނުލިބެނީސް ނުވަތަ އެ ފަރާތްތަކަށް ފައިސާގެ އެހީތެރިކަން ލިބޭނެ އިތުރު ގޮތެއް ފަހިނުވާކަމުގައި ވާނަމަ، އުރީދޫ ބިލަށް ފައިސާ ނުދެއްކިއަސް ޖޫން 2020 ގެ ނިޔަލަށް އެފަރާތްތަކުގެ ޙިދުމަތް ކަނޑައެއްނުލާނެ.
އުރީދޫން ބުނީ މާލީ ދަތިތަކާއި ކުރިމަތިލާންޖެހިފައިވާ ކަސްޓަމަރުން ފައިސާ ދެއްކުމުގެ މުއްދަތު އިތުރުކުރުމަށްhttp://ore.do/billsupportމެދުވެރިކޮށް ރިކުއެސްޓްކުރެވޭނެކަމަށެވެ.
އުރީދޫން ހަމަޖައްސައިދިން ލުއި ގޮތްތަކާއި ގުޅިގެން އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވީ މި ނާޒުކު ދަނޑިވަޅުގައި، އެންމެހާ ފަރާތްތަކަށްވެސް ރަނގަޅު ފެންވަރުގެ ޚިދުމަތްތަކެއް ފޯރުކޮށްދެވޭކަން ޔަޤީންކުރުމަށްޓަކައި، ސަރުކާރުން ޚިދުމަތްދޭ ފަރާތްތަކާއި ގުޅިގެން ވަރަށް ގާތުން މަސައްކަތްކުރަމުން އަންނަ ކަމަށެވެ. އަދި ޑިޖިޓަލް ޚިދުމަތްތަކުގެ ބޭނުން ކުރިޔަށްވުރެ މުހިންމު ވެފައިވާ މި ދުވަސްވަރު، ކަސްޓަމަރުންނަށް ޚިދުމަތް ފޯރުކޮށްދެވޭކަން ޔަޤީންކުރުމަށްޓަކައި އުރީދޫ މޯލްޑިވްސްއިން މުހިންމު ފިޔަވަޅުތައް އެޅީތީ، އެ ކުންފުންޏަށް ޝުކުރު އަދާކުރާކަމަށް މިނިސްޓަރ ފައްޔާޒް ވިދާޅުވިއެވެ.
ޔަޤީނުންވެސް މާލީ ދަތިކަން ކުރިމަތިވެފައިވާ ފަރާތްތަކަށް ވަރަށް ބޮޑު ލުޔެއް މިކަމާއި އެކު ލިބިގެންދާނެ. ކޮވިޑް-19 އާއި ގުޅިގެން ރާއްޖޭގެ ފަތުރުވެރިކަމާއި، ކޯޕަރޭޓް ދާއިރާއަށް ލިބުނު ގެއްލުމާއި ގުޅިގެން، ޓެލެކޮމިއުނިކޭޝަން ހިމެނޭގޮތަށް، ވަރަށް ގިނަ ދާއިރާތަކަށް ވަނީ އަސަރުކޮށްފައި. ގޮންޖެހުންތަކާއި ކުރިމަތިލާން ޖެހިފައިވާ މި ދަނޑިވަޅުގައި، ކަސްޓަމަރުންނާއި އިމަރޖެންސީ ރެސްޕޮންސް ޓީމުތަކަށް ފޯރުކޮށްދެވޭ އެހީތެރިކަން ސަރުކާރުން ފާހަގަކުރަން.އިކޮނޮމިކް މިނިސްޓަރ ފައްޔާޒް އިސްމާއިލް
އުރީދޫގެ ސީއީއޯ ނަޖީބް ޚާން ވިދާޅުވީ ކޮވިޑް-19ގެ ސަބަބުން، މީގެ ކުރިން ކުރިމަތިލާން ޖެހިފައިނުވާ ގޮންޖެހުންތަކާއި ދުނިޔޭގެ އެކިކަންކޮޅުތަކުގައި ކުރިމަތިލާންޖެހިފައިވާކަމަށެވެ. އަދި ކުންފުންޏަށް ދިމާވެފައިވާ އުނދަގޫތަކުން އަރައިގަތުމަށް މަސައްކަތްކުރަމުން އަންނަ މި ދަނޑިވަޅުގައި، އެންމެ އިސްކަމެއްދޭ ކަމަކީ ކަސްޓަމަރުންނަށް ބޭނުންވާ ކަންކަން ފުރިހަމަކޮށްދީ، އެހީތެރިކަން ފޯރުކޮށްދިނުންކަމަށެވެ.
ސަލާމަތާ ރައްކާތެރިކަމަށްޓަކައި އެކަހެރިވެ އުޅެންޖެހިފައިވާ މި އައު ދިރިއުޅުމުގައި، އެކަކު އަނެކަކާއި އޮންނަ ގުޅުން ބަދަހިކޮށް، މުހިންމު މަޢުލޫމާތާއި ޚާބަރުތަކަށް ވާޞިލުވުމުގައި ޓެލެކޮމިއުނިކޭޝަންގެ މުހިންމު ދައުރެއް އޮތްކަން ޤަބޫލުކޮށް، ރާއްޖޭގެ އެކި ކަންކޮޅުތަކަށް ފެންވަރު ރަނގަޅު އަދި ފަސޭހަކަމާއިއެކު ލިބިގަނެވޭނެ ޚިދުމަތްތަކެއް ފޯރުކޮށްދިނުމަށް އަޅުގަނޑުމެންގެ ޓީމުން ދަނީ ވަރަށް ބުރަ މަސައްކަތްތަކެއް ކުރަމުން.އުރީދޫގެ ސީއީއޯ ނަޖީބް ޚާން
އުރީދޫ މޯލްޑިވްސްއިން، ބުނިގޮތުގައި އެ ކުންފުނިން ދަނީ ކޮވިޑް-19 ބަލިމަޑުކަމާއި ގުޅިގެން މުޖުތަމަޢަށް ކުރިމަތިވަމުންދާ ދަތިތަކާއި މައްސަލަތަކަށް ލުއިފަސޭހަ ގޮތްތަށް ހޯދާދިނުމުގައި ކެނޑިނޭޅި މަސައްކަތްކުރަމުންނެވެ. އަދި ކަސްޓަމަރުންނަށް ޚާއްޞަ ފުރުޞަތުތަކާއި، އިމަރޖެންސީ ރެސްޕޯންސް ޓީމުތަކަށް ހިލޭ ކަނެކްޝަންގެ އިތުރުންވެސް އެހެނިހެން އެހީތައް ފޯރުކޮށްދެމުންކަމަށް އެ ކުންފުނިން ބުންޏެވެ. މީގެ އިތުރުން، އަވަސް އެހީ އަށް ބޭނުންވެފައިވާ ފަރާތްތަކަށް ލުޔެއް ހޯދައިދިނުމަށް އެކި އެކި ދާއިރާތަކުގެ ޕާރޓްނަރުންނާއި ގުޅިގެން ތަފާތު މަސައްކަތްތަކެއްވެސް ކުރަމުން އަންނަކަމަށްވެސް އެކުންފުނިން ބުނެފައިވެއެވެ.
