ކޮވިޑް-19 އާ ގުޅިގެން ގިނަ ޤައުމުތަކުގެ ބޯޑަރު ބަންދު ކޮށްފައިވާއިރު، އެކަމުގެ ސަބަބުން ވިޔަފާރިވެރިންނަށް މުދާ އެތެރެ ކުރުމުގައި ދިމާވާ ދަތިތައް ހިއްސާކުރުމަށް މޯލްޑިވްސް ކަސްޓަމްސް ސަރވިސަސްއިން ބުނެފި އެވެ.

ބުދަ ދުވަހު ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކަސްޓަމްސްގެ ޑެޕިއުޓީ ކޮމިޝަނަރ ޢަބްދުﷲ ޝަރީފް ވިދާޅުވީ، ކަސްޓަމްސްގެ މަސައްކަތްތައް ބައްޓަން ކުރެވިފައި ހުންނަނީ ބައިނަލްއަޤުވާމީ މިންގަނޑުތަކާ އެއްގޮތްވާ ގޮތުގެ މަތިން ކަމަށާއި، ކަސްޓަމްސްގެ ޤާނޫނުން ލާޒިމުކޮށްފައިވާ ކަންކަމުގެ ތެރޭގައި ވިޔަފާރި ހިމާޔަތް ކުރުން ހިމެނޭކަމަށެވެ. އެގޮތުން އެކަމަށް މިދަނޑިވަޅުގައިވެސް ޚާއްޞަ އިސްކަމެއްދެއްވާކަން ޝަރީފް ފާހަގަކުރެއްވި އެވެ.

ޝަރީފް އިތުރަށް ވިދާޅުވީ، ކަސްޓަމްސްއަކީ ބައިނަލްއަޤުވާމީ މުއާހަދާތަކުގައި ބައިވެރިވެ އޭގެ ދަށުން ޤައުމުތަކުގެ އެހީ ހޯދައިގެން މަސައްކަތް ކުރަމުން އަންނަ މުއައްސަސާއެއް ކަމަށެވެ. އެހެންކަމުން ޤައުމުތަކުގެ ކަސްޓަމްސްއާ ގުޅިގެން ވިޔަފާރިވެރިންނަށް ކުރިމަތިވެފައިވާ މައްސަލަތައް ޙައްލުކުރުމުގެ މަސައްކަތް ކުރައްވާނެކަމަށެވެ.

ކޮވިޑް-19 އާ ގުޅިގެން ގިނަ ޤައުމުތަކުގެ ބޯޑަރުތައް ބަންދު ކޮށްފައިވާއިރު، އެކަމުގެ ސަބަބުން ދިވެހި ވިޔަފާރިވެރިންނަށް މުދާ އިމްޕޯޓް ކުރުމުގައި ދިމާވާ ދަތިތައް ހިއްސާކޮށްދިނުމަށް ކަސްޓަމުން ވަނީ އެދިފަ އެވެ.

އޭގެ އިތުރުން، އެކްސްޕޯޓް އިމްޕޯޓް ވިޔަފާރި ކުރާ ފަރާތްތަކުންވެސް އެއްވެސް ކަހަލަ ލިއެކިއުމެއް ބަދަލުކުރަން ޖެހިއްޖެނަމަ ޑިޖިޓަލް ޕްލެޓްފޯރމްގެ ޒަރީއާއިން އެ ލިއެކިއުމެއް ބަލައިގަތުމުގެ ލުއި ދިނުމަށް އެދުންވެސް އޭގެ ތެރޭގައި ހިމެނޭކަމަށް އޭނާ ވިދާޅުވި އެވެ. އަދި އެ އިންތިޒާމްތައް މިހާރު ހަމަޖައްސަވާފައިވާކަމަށް ކަސްޓަމްސްއިން ބުނެފައި ވެއެވެ.