ކަޕިލް ޝަރްމާ ޝޯވ އިން ހަނދާން އާކުރުމުގެ ގޮތުން މި ހަފްތާ ބަންދުގައި އިރްފާން ޙާން އާއި ރިޝީ ކަޕޫރުގެ އެޕިސޯޑްތައް ރީ ޓެލެކާސްޓް ކުރަން ނިންމައިފިއެވެ.

މި އެޕިސޯޑްތައް ދައްކާނީ ސޮނީ ޓީވީ އިންނެވެ. ބޮލީވުޑްގެ މަޝްހޫރު ތަރި އިރްފާން ޙާން ބުދަ ދުވަހު ނިޔާވެފައިވާއިރު ޖެހިގެން އައި ދުވަހު ރިޝީ ކަޕޫރު ވެސް ވަނީ މުމްބައިގެ ހޮސްޕިޓަލެއްގައި ނިޔާވެފައެވެ.

އިރްފާން ނިޔާވެފައި ވަނީ މުމްބާއީގެ ކޮކީލާބެން ދިރުއަމްބާނީ ހޮސްޕިޓަލުގައި ބުދަ ދުވަހުގެ ހެނދުނުގެ ވަގުތެއްގަ އެވެ. އުމުރުން 53 އަހަރުގެ އިރްފާނު ނިޔާވީ ހޮސްޕިޓަލުގެ އައީސީޔޫގައި ފަރުވާ ހޯދަމުން ގެންދަނިކޮށެވެ. އިރުފާން ނިޔާވެފައިވަނީ ކެންސަރާ ހަނގުރާމަ ކުރަމުން އަންނަނިކޮށެވެ. އިރްފާން އަށް ކެންސަރު ޖެހުނުކަން އިނގުނީ 2018 ވަނަ އަހަރުގައެވެ.

ބޭރުގެ މީޑިއާތަކުން ރިޕޯޓުކޮށްފައިވާގޮތުން ރިޝީ ވެސް ނިޔާވީ ކެންސަރު ބައްޔަށް ފަރުވާ ހޯދަމުންދަނިކޮށެވެ.

އެހެންކަމުން ކަޕިލް ޝަރްމާ ޝޯވްގެ ޕްރޮޑިއުސަރުން ވަނީ އެ ދެ ތަރިންގެ އަގުވަޒަންކޮށް ހަނދާން އާ ކުރުމުގެގޮތުން އެ ދެ ތަރިންގެ ޝޯވ އަލުން އެއަރ ކުރަން ނިންމާފައެވެ. މިކަން ކަށަވަރުކޮށްދެމުން އެކްޓަރު އަދި ކޮމޭޑިއަން ކިކޫ ޝަރްދާ ވަނީ 2 ޓްވީޓެއް ކޮށްފައެވެ.

ޓްވީޓްގައި ކިކޫ ބުނީ މި ދެ ތަރިންގެ ހަނދާން ކުރުމުގެގޮތުން މި ހަފްތާ ބަންދުގައި ޝޯވތައް ދައްކާނެ ކަމަށެވެ. އަދި ދެ ތަރިންވެސް ވަރަށް ހަނދާންވާ ކަމަށް 2 ޓްވީޓްގައި ވެސް ކިކޫ ބުނެފައިވެއެވެ. އަދި ރިޝީ ކަޕޫރުގެ އެޕިސޯޑްގައި އޭނާގެ ލޯބިވާ އަންހެނުން ނީތޫ ކަޕޫރު ވެސް ފެނިގެންދާނެ ކަމަށް ބުންޏެވެ.

މި ދެ އެޕިސޯޑް ވެސް ހޮނިހިރު އަދި އާދީއްތަ ދުވަހުގެ ރޭގަނޑު އިންޑިއާ ގަޑިން 21:00 ގައި އެއަރ ކުރެވޭނެ އެވެ.

މީގެ އިތުރުން ވެސް ކީކު ވަނީ އިރްފާން ޙާން އެންމެ ފަހުން ފެނިގެންދިޔަ "އަންގްރޭޒީ މީޑިއަމް"ގެ ސެޓުގައި އިރްފާން ޙާން އާއި އެކު ނަގާފައިވާ ފޮޓޯ އެއް ރީ ޓްވީޓް ކޮށްފައެވެ. ރީ ޓްވީޓް ކުރަމުން ކީކު ބުނީ އިރްފާން ޙާން އާއި އެކުވަގުތުކޮޅެއް ހޭދަ ކޮށްލަން ފުރުސަތު ލިބުމުން ވަރަށް އުފާވާކަމަށެވެ. މިއީ ކިކޫގެ ފޭނަކު ކޮށްފައިވާ ޓްވީޓެކެވެ.