ނޮވެލް ކޮރޯނާވައިރަސް އާ ގުޅިގެން ޖަޕާނުގައި އިއުލާނު ކޮށްފައިވާ އިމަޖެންސީ ގެ މުއްދަތު އިތުރު މަސްދުވަހަކަށް ދަންމަން ޖަޕާނުގެ ސަރުކާރުން ވިސްނަމުންދާ ކަމަށް ރޮއިޓާސް އިން ބުރާސްފަތި ދުވަހު ބުނެފިއެވެ.

ޖަޕާނުގައި މިހާރު އިއުލާނު ކޮށްފައިވާ އިމަޖެންސީގެ މުއްދަތު ނިމޭނީ މެއި މަހުގެ 6 ވަނަ ދުވަހަށެވެ.

މިހާރު ކަނޑައަޅާފައިވާ ތާރީޚަށް އާއްމު ދިރިއުޅުމަކަށް ބަދަލު ވުމަށް ދަތި ވާނެ ކަމަށް ޖަޕާނުގެ ބޮޑުވަޒީރު ޝިންޒޯ އަބޭ ރިޕޯޓަރުން ގާތު ވާނީ ވިދާޅުވެފައެވެ.

ވެރިރަށް ޓޯކިޔޯ ހިމެނޭ ގޮތުން ޖަޕާނުގެ 7 ސަރަހެއްދެއްގައި އިމަޖެންސީ ހިންގުމަށް ބޮޑުވަޒީރު އިއުލާން ކުރެއްވީ އޭޕްރީލް މަހުގެ 7 ވަނަ ދުވަހުއެވެ.

އިމަޖެންސީ އިއުލާން ކުރުމާއެކު، ރައްޔިތުން ގޭގައި ތިބުމަށް އަމުރު ކުރުމަށާއި، ވިޔަފާރިތައް ބަންދު ކުރުމަށް އަމުރު ކުރުމުގެ ބާރު ސަރުކާރަށް ލިބެއެވެ. ނަމަވެސް މިއިން ކަމަކާ ޚިލާފު ވިޔަސް އަދަބެއް ދެވޭ ގޮތެއް ގާނޫނީ ގޮތުން ޖަޕާނުގައި ހަމަޖެހިފައެއް ނޯވެއެވެ.

ޖަޕާނުގައި މިހާތަނަށް 14،000 (ސާދަ ހާސް) މީހުންނަށް ކޮރޯނާވައިރަސް ޖެހިފައިވާއިރު ބަލީގައި 436 މީހުން މަރުވެފައިވާ ކަމަށް އެ ގައުމުގެ ޕަބްލިކް ބްރޯޑްކާސްޓަރ އެން.އެޗް.ކޭ އިން ހާމަ ކޮށްފައިވެއެވެ. މިއީ ޔޫރަޕް އާއި އެމެރިކާ އަށް ބަލާއިރު ދަށް އަދަދުތަކެއް ކަން ފާހަގަ ކުރެވެއެވެ.

ބައްޔަށް ޕޮސިޓިވް ވެފައިވާ މީހުންގެ ތެރެއިން 4،000 މީހުން ނިސްބަތްވަނީ ވެރިރަށް ޓޯކިޔޯ އަށެވެ. ބުރާސްފަތި ދުވަހު އަލަށް 46 މީހުންނަށް ކޮވިޑް-19 ރޯގާ ޖެހިފައިވާ ކަން ރިޕޯޓު ކޮށްފައި ވެއެވެ.

ކޮރޯނާވައިރަސްގެ ސަބަބުން ކުރިމަތިވެފައިވާ އިގްތިސާދީ މައްސަލަތަކުން އަރައިގަތުމަށް ޖަޕާނު ސަރުކާރުން 1 ޓްރިލިއަން ޑޮލަރުގެ ޕްރޮގްރާމެއް ވަނީ ފަށާފައެވެ.

ޖަޕާނުގެ ކޮންމެ ރައްޔިތަކަށް 100،000 (އެއް ލައްކަ) ޔެން ނުވަތަ 938 ޑޮލަރުގެ އެހީ ސަރުކާރުން ދޭ ގޮތައް ވަނީ ހަމަޖައްސާފައެވެ.