އަވަށްޓެރި ސްރީލަންކާގައި އެއް ދުވަހެއްގެ މައްޗަށް ކޮވިޑް-19 ގެ ކޭސްތައް އެންމެ ގިނައިން ރިޕޯޓް ކުރެވުނު ދުވަހަކަށް އާދިއްތަ ދުވަސް ވެއްޖެއެވެ.

ލަންކާގެ ހެލްތް މިނިސްޓްރީން ހާމަކޮށްފައިވާ މައޫލޫމާތުތަކަށް ބާލައިރު އާދިއްތަ ދުވަހު އެގައުމުން ވަނީ 63 ކޭސް އެއް ރިޕޯޓް ކޮށްފައެވެ. އެއީ މިހާތަނަށް 24 ގަޑިއިރުގެ ތެރޭގައި ލަންކާގައި އެންމެ ގިނައިން ކޭސްތަކުގެ އަދަދު ރިޕޯޓް ކުރެވުނު ދުވަހެވެ.

ލަންކާގެ އަސްކަރިއްޔާގެ ކޮމަންޑަރު ލެފްޓިނެންޓް ޖެނެރަލް ޝަވެންދްރަ ސިލްވާ ވިދާޅުވީ، 63 ކޭސްގެ ތެރެއިން 53 ކޭސް އަކިީ އަސްކަރިއްޔާގެ ސިފައިން ކަމަށެވެ. އޭގެ ތެރެއިން 16 މީހުންނަކީ ވެލިސަރަގައި ހުންނަ ސިފައިންގެ ''ބޭސް'' ގައި ތިބި މީހުންނެވެ. އަދި ބާކީ ތިބި މީހުންނަކީ އެކި ސަރަހައްދުތަކުން ރިޕޯޓް ކުރެވިފައިވާ ކޭސްތައް ކަމަށް އޭނާ ވިދާޅުވިއެވެ.

ހޯމަ ދުވަހު ކޮވިޑް-19 ރިޕޯޓް ކުރެވުނު އައު 58 ކޭސްއާއި އެކު ކޮވިޑް-19 ޖެހުނު މީހުންގެ އަދަދު ވަނީ 581 ށް އަރާފައެވެ. އެހެން ކަމުން މި އަދަދު އަދި އިތުރުވެގެން ދިޔުން އެކަށީގެންވެއެވެ.

ލަންކާއިން އެންމެ ފުރަތަމަ ކޮވިޑް-19 ގެ ކޭސް އެއް ރިފޯޓް ކުރެވިފައިވަނީ ޖެނުއަރީ މަހުގެ 27 ވަނަ ދުވަހު ޗައިނާގެ ފަތުރުވެރިއެއްގެ ފަރާތުންނެވެ. މިހާތަނަށް މިބަލިން 120 މީހަކު ރަނގަޅުވެފައިވާއިރު، ބަލި ޖެހިގެން ހަތް މީހަކު ވަނީ މަރުވެފައެވެ.