ގިނަ އަދަދެއްގެ ބަނގުރަލާއެކު ބިދޭސީއަކު ހައްޔަރުކޮށްފިއެވެ.

މިކަމާއި ގުޅޭގޮތުން މައުލޫމާތު ދެމުން ފުލުހުން ބުނެފައިވަނީ ބަނގުރަލާއެކު މީހަކު ހައްޔަރުކޮށްފައިވަނީ ހޮނިހިރު ދުވަހުގެ ރޭ 19:20 ހާއިރު ކ. މާފުށީ ޕޮލިސް ސްޓޭޝަންގައި މަސައްކަތް ކުރާ ފުލުހުން ޕެޓްރޯލް ކުރަމުން ދަނިކޮށް، ބަނދަރުމަތީ ހުރި މީހަކަށް ތުހުމަތު ކުރެވިގެން ބަލާ ފާސްކުރުމުގެ ތެރެގައި ކަމަށެވެ.

އެގޮތުން އެ ބިދޭސީ މީހާ އަތުން 7 ދަޅުގެ ބިޔަރު ފެނިފައިވާ ކަމަށެވެ. އަދި އެއީ 24 އަހަރުގެ ބަންގްލަދޭޝްއަށް ނިސްބަތްވާ މީހެއް ކަމަށް ފުލުހުން ބުނެފައިވެއެވެ.

ފުލުހުން ބުނީ އެ މީހާ ހައްޔަރުކޮށް، ފުލުހުންނަށް ލިބުނު މައުލޫމާތާއި ގުޅިގެން ހޮނިހިރު ދުވަހުގެ ރޭ 21:35 ހާއިރު އޭނާ ދިރިއުޅެމުންދާ ގެ ފާސްކުރިއިރު އެކި ބްރޭންޑުތަކުގެ 42 ފުޅި ބަނގުރަލާއި 203 ދަޅު ބިޔަރު ފެނިފައިވާ ކަމަށެވެ.

ފުލުހުން ދަނީ މި މައްސަަލަ އިތުރަށް ތަހުގީގު ކުރަމުންނެވެ.