މާލެ ސިޓީ ގެދޮރުގެ ކުލި ކޮންޓްރޯލް ކޮށްދިނުމަށް އެދި ރައްޔިތުންގެ މަޖިލީހަށް ޕެޓިޝަނެއް ހުށަހަޅަން ނިންމައިފިއެވެ.
ރައްޔިތުންގެ މަޖިލީހަށް މިޕެޓިޝަން ހުށަހަޅަން ނިންމީ މާލޭ ޓެނަންޓްސް ޔޫނިއަން (އެމްޓީޔޫ) ޖަމިއްޔާއިންނެވެ. މިޖަމިއްޔާއަކީ ކުއްޔަށް ދިރިއުޅެމުން އަންނަ މީހުންނަށް ދިމާވާ އުނދަގޫތަކާއި، އެމީހުންގެ ހައްގުތަކުގައި ވަކާލާތުކޮށް ކުއްޔަށް ދިރިއުޅޭ މީހުންގެ އަޑަށް ރަސްމީ ސިފައެއް ގެނެސްދިނުމުގެ މަގުސަދުގައި އުފައްދާފައިވާ ޖަމިއްޔާއެކެވެ.
15 އޮކްޓޫބަރު 2019 ގައި އުފެއްވި އެމްޓީޔޫއިން ބުނީ މާލެ ސިޓީގެ ގެދޮރުގެ ކުލި ކޮންޓްރޯލްކުރަންޖެހޭ ކަމަށާއި، ރައްޔިތުންގެ ކަންބޮޑުވުންތަކަށް ހައްލެއް ހޯދަދޭންޖެހޭ ކަމަށެވެ. އެމްޓީޔޫއިން ބުނީ ގެދޮރުތަކުގެ ކުލި ކޮންޓްރޯލްކުރުމަށް ޕެޓިޝަންގައި ސޮއިކޮށް މަޖިލީހަށް ހުށަހަޅަން ނިންމާފައިވާ ކަމަށެވެ.
އެގޮތުން ހުކުރު ދުވަހުގެ ހަވީރު 16:00 އިން 18:00 އަށް ކާނިވާ ސަރަހައްދުގައި މިޕެޓިޝަންގައި ސޮއިކުރުން އޮންނާނެ ކަމަށެވެ. ޕެޓިޝަނުގައި ސޮއިކުރަން ނުވަތަ ކުލި ކޮންޓްރޯލް ކުރުމާ ގުޅޭގޮތުން މަޝްވަރާކުރަން ބޭނުންވާ ފަރާތްތަކަށް އެފުރުސަތު ވެސް ހުޅުވާލާފައިވާ ކަމަށް އެމްޓީޔޫއިން މައުލޫމާތުދެއެވެ.
މީގެ އިތުރުން އެމްޓީޔޫއިން ބުނީ މާލޭގެ ކުލި ކޮންޓްރޯލް ކުރުމަށް ބާރުއަޅާ ކެމްޕެއިނެއްވެސް ކުރިއަށް ގެންދާނެ ކަމަށާއި، މިކެމްޕޭނަށް ތައްޔާރުވަމުން އަންނަ ކަމަށެވެ. މާލެ ސިޓީގައި ދުވަހެއް ދުވަހަކަށް ކުލި މައްޗަށް ދިއުމަކީ ގިނަ ރައްޔިތުންގެ ކަންބޮޑުވުމުކެވެ.
