ހައިކޯޓުގެ އިސްފަނޑިޔާރު ޝުޖާއު އުސްމާންއަށް ބިރު ދައްކައި މަރާލާނެ ކަމުގެ އިންޒާރުދިން މީހާ، ހައްޔަރު ކުރުމުގެ އަމުރެއް ނެރެފި އެވެ.

ފުލުހުން ތަހުގީގު ކުރަމުންދާ އެމައްސަލާގައި ހައްޔަރު ކުރުމުގެ އަމުރަކަށް އެދުމުން އެ އަމުރު ނެރެދީފައިވަނީ މާލެ އަތޮޅު ކާށިދޫ މެޖިސްޓްރޭޓް ކޯޓުން ނެވެ.

އެއަމުރުގައި ވާގޮތުން، ފުލުހުން ހައްޔަރު ކުރުމުގެ އަމުރަކަށް އެދިފައިވަނީ ކ. މާފުށި، ވައިޓްފިޝް، އަލީ މުރުތަޟާ އެވެ.

އެއަމުރުގައި ވާގޮތުން، އޭނާ ހައްޔަރު ކުރުމުގެ އަމުރަކަށް ފުލުހުން އެެދިފައިވަނީ، މިމަހުގެ 20 ވަނަ ދުވަހުގެ ހަވީރު 17:15 ހާއިރު، ހައިކޯޓުގެ އިސް ފަނޑިޔާރު ޝުޖާއު އުސްމާންގެ ގައިގައި ޖަހާ، މާރާމާރީ ހިންގާނެ ކަމަށާއި، މަރާލާނެ ކަމަށްބުނެ، އަލީ މުރުތަޟާ އިންޒާރުދީފައިވާ ކަމަށް ތުހުމަތު ކުރެވޭ މައްސަލާގައި މުޖުތަމައުގެ ސަލާމަތާއި ރައްކާތެރިކަމަށްޓަކާ ކަމަށެވެ.

އެއަމުރާ ގުޅިގެން އޭނާ ހައްޔަރު ކޮށްފައިވާ ކަމަށް ފުލުހުން ވަނީ ކަށަވަރު ކޮށްދެއްވާފަ އެވެ،