ދިވެހިރާއްޖޭގެ ހައިކޯޓުގެ އިސް ފަނޑިޔާރު ޝުޖާޢު އުޘްމާނަށް، މަރުގެ އިންޒާރު ދީފައިވާތީ އެކަން ދިވެހިރާއްޖޭގެ ހައިކޯޓުން ހަރުކަށި ޢިބާރާތުން ކުށްވެރިކޮށް ބަޔާނެއް ނެރެފިއެވެ.
ހައިކޯޓުން ޢާންމުކޮށްފައިވާ ބަޔާނުގައި ބުނެފައިވަނީ؛ މަރުގެ އިންޒާރު ދިނުމަކީ ޖިނާޢީ ކުށަކަށް ވާތީ މި ޢަމަލު ހިންގި ފަރާތް ހޯދައި، ޤާނޫނީ ފިޔަވަޅު އެޅުމަށް މޯލްޑިވްސް ޕޮލިސް ސަރވިސް އާއި ކަމާބެހޭ ފަރާތްތަކަށް އިލްތިމާސް ކުރާކަމަށެވެ.
ހައި ކޯޓުން ދެކޭ ގޮތުގައި އެއްވެސް މީހެއްގެ ހަށިގަނޑާ ފުރާނައަށް ގެއްލުންދިނުމާއި، މަރުގެ އިންޒާރު ދިނުމަކީ އެއްވެސް ސިފައެއްގައި ބަލައިގަނެވޭނެ ކަމެއް ނޫން ކަމަށްވެސް ހައިކޯޓުގެ ބަޔާނުގައި ބުނެފައިވެއެވެ.
ހައިކޯޓުގެ އިސް ފަނޑިޔާރު ޝުޖާއު އުޘްމާނަށް މަރުގެ އިންޒާރު ދިން މައްސަލައެއް ބަލަމުންދާ ކަމަށް ފުލުހުން ވެސް ވަނީ ބުނެފަ އެވެ. ފުލުހުންގެ އިދާރާއިން ބުނެފައިވަނީ، ހައިކޯޓުގެ އިސް ފަނޑިޔާރު ޝުޖާއު އުޘްމާނަށް މަރުގެ އިންޒާރު ދީފައިވާތީވެ އެ މައްސަލަ ބަލައިދިނުމަށް އެދި ހައިކޯޓުން ފޮނުވާފައިވާ ސިޓީއެއް ފުލުހުންނަށް ލިބިފައިވާ ކަމަށެެވެ. މި މައްސަލައިގެ އިތުރު ތަފުޞީލެއް ފުލުހުންނާއި ހައިކޯޓުން ވެސް ހާމައެއް ނުކުރެއެވެ.
މަޢުލޫމާތު ލިބިފައިވާ ގޮތުން ހައިކޯޓުގެ އިސް ފަނޑިޔާރު ޝުޖާޢަށް މަރުގެ އިންޒާރު ދީފައިވަނީ ޗުއްޓީ ހޭދަކޮށްލެވުމަށް ކ. މާފުއްޓަށް ވަޑައިގެން އުޅުއްވަނިކޮށެވެ. 2015 ވަނަ އަހަރުން ފެށިގެން ހައި ކޯޓުގައި މަސައްކަތް ކުރައްވަމުން ގެންދަވާ ޝުޖާއު އުޘްމާން، އެ ކޯޓުގެ އިސް ފަނޑިޔާރުގެ މަޤާމަށް ޢައްޔަން ކުރެއްވީ މިދިޔަ އަހަރުއެވެ. އޭގެ ކުރިން އޭނާ ހުންނެވީ ކްރިމިނަލް ކޯޓުގެ ފަނޑިޔާރު ކަމުގައެވެ. ޝުޖާޢު ސިޔާސީ ގިނަ ބޭފުޅުންގެ މައްސަލަތައް ބައްލަވާފައިވެއެވެ.
