މޫސުމަށް ދޭންޖެހޭ ސަމާލުކަން ނުދީ ކުރާ ދަތުރެއްގައި މީހެއްގެ ފުރާނައަށް ނުރައްްކާ ވެއްޖެނަމަ އެކަމުގެ ޒިންމާ އުފުލަންޖެހޭ ފަރާތާމެދު ފިޔަވަޅު އަޅާނެ ކަމަށް ކޯސްޓްގާޑްގެ ކޮމަޑާން ކާނަލް މުހައްމަދު ސަލީމް ވިދާޅުވެއްޖެއެވެ.
ސަލީމް މިހެން ވިދާޅުވީ އދ. މާމިގިލިން ފުރައިގެން ފ. ފީއައްޔަށް ދަތުރުކުރަމުން ދަނިކޮށް ޑިންގީ ގެއްލުނު ހާދިސާއާއި ގުޅޭ އެންމެ ފަހުގެ މަޢުލޫމާތު ހާމަކުރުމަށް އެމްއެންޑީއެފްގެ މައި މަރުކަޒުގަ ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުންނެވެ.
މިދުވަސްވަރަކީ ރާއްޖެއަށް މޫސުން ގޯސް ދުވަސްވަރެއްކަން ފާހަގަ ކުރައްވާ ސަލީމް ވިދާޅުވީ ލައިފް ޖެކެޓް އެޅުމާއި ސަލާމަތީ ކަންކަން ބެލުމަށްފަހު ދަތުރުކުރުމަށް އަބަދުވެސް އިލްތިމާސްކުރައްވާ ކަމަށެވެ. ސަލީމް ވިދާޅުވީ ކުދި ކުދި އުޅަނދުތަކުގައި ދަތުރުކުރާއިރު މޫސުމަށް ބަލައިގެން ނޫނީ ދަތުރު ކުރިއަށް ނުގެންދިއުމަށް އެމްއެންޑީއެފުންނާއި މެޓް އޮފީހުން ވެސް ވަރަށް ބޮޑަށް އިލްތިމާސްކުރާ ކަމަށެވެ. އަދި މެޓް އޮފީހުން އެލަރޓްތައް ތަފުޞީލުކޮށް ނެރެމުން ދާއިރު ދަތުރު ނުކުރަން ސަލީމް ވިދާޅުވިއެވެ.
އިތުރަށް ވާހަކަދައްކަވަމުން ސަލީމް ވިދާޅުވީ މޫސުމަށް ދޭންޖެހޭ ސަމާލުކަންނުދީ ކުރާ ދަތުރެއްގައި މީހެއްގެ ފުރާނައަށް ނުރައްކާ ވެއްޖެނަމަ އެކަމުގެ ޒިންމާ އުފުލަންޖެހޭ ފަރާތާއި މެދު ފިޔަވަޅު އަޅާނެ ކަމަށެވެ.
ހާއްސަ ގޮތެއްގައި މިކަހަލަމަކާއި ދިމާވެގެން މީހެއްގެ ފުރާނައަށް ނުރައްކާވެއްޖެ ކަމަށް ވެއްޖިއްޔާމުން އެމީހަކާ ދޭތެރޭގައި އަޅަންޖެހޭ ފިޔަވަޅު ސަރުކާރުގެ ކަމާބެހޭ ފަރާތްތަކުން އަޅާނެ. އެހެންވީމަ މިކަންކަމާ ދޭތެރޭގައި މިހާރަށްވުރެ ބޮޑަށް ތަންކޮޅެއް ސަމާލުކަންދީގެން މީހެއްގެ ފުރާނައަށް ނުރައްކާނުވާނެ ގޮތަށް މި ޗުއްޓީތެރޭގައި ކަންކަން ގެންދިއުން އެއީ އަޅުގަނޑުމެން ވަރަށް ބޮޑަށް އެދޭ ކަމެއްކޯސްޓްގާޑްގެ ކޮމަޑާން ކާނަލް މުހައްމަދު ސަލީމް
ހަތަރު މީހުންނާއއެކު ދަތުރުކުރަމުން ދަނިކޮށް ގެއްލުނު ޑިންގީ ވަނީ ހުކުރު ދުވަހުގެރޭ 20:15 ހާއިރު ފެނިފައެވެ. ޑިންގީއެއް ގެއްލިގެން އުޅޭ ކަމުގެ ރިޕޯޓް އެމްއެންޑީއެފަށް ލިބިފައިވަނީ ހަވީރު ފަހެއް ޖެހިހާއިރުއެވެ. ސަލީމް ވިދާޅުވީ، އެ ޙާދިސާ ދިމާވީ މާމިގިލިން ފުރައިގެން ދަނިކޮށް ވާރޭ ވެހުމާއެކު ދަތުރުކުރަމުން ދިޔަ ދިމާ ނޭގި ދަތުރުކުރެވުމުން ކަމަށް އެ ޑިންގީ ދުއްވި މީހާ ބުނެފައިވާ ކަަމަށެވެ.
