ކުށުގެ ތުހުމަތުގައި ގޮވައިގެންދިޔަ ފުލުހުންގެ ލޯންޗެއްގެ އިންޖީނު ހަލާކުވެ ހާލުގައި ޖެހުމުން، ކަންނެލި ދޯންޏަކުން އެހީތެރިކަން ފޯރުކޮށްދީފިއެވެ.
ފުލުހުން ބުނީ ހުކުރު ދުވަހު އދ. އަތޮޅުގެ ރަށަކުން މީހަކު ހައްޔަރުކޮށްގެން އެ އަތޮޅު މަހިބަދޫއަށް ދިޔަ ދަތުރުމަތީގައި ލޯންޗްގެ އިންޖީނު ހަލާކުވެ ހާލުގައި ޖެހުނު ކަމަށެވެ.
ފުލުހުންނަށް އެހީތެރިވެދީފައިވަނީ މަހިބަދޫ "އަސުރުމާ3" ނަމަކަށް ކިޔާ ކަންނެލި ދޯންޏަކުންނެވެ. ފުލުހުން ވަނީ އެ ދޯނީގެ ކައްޕިއާއި ފަޅުވެރިންނަށް ޝުކުރު އަދާކޮށްފައެވެ.
މިދުވަސްވަރަކީ ރާއްޖޭގެ އެކި ކަންކޮޅުތަކަށް ވިއްސާރަ ކުރަމުންދާ ދުވަސްވަރެއް ކަމުން ރާއްޖޭގެ ކަނޑުތައް ވެސް އާދައިގެ ވަރަކަށް ގަދަ ވާނެ ކަމަށް މޫސުމާއި ބެހޭ ގައުމީއިދާރާއިން މައުލޫމާތު ދެއެވެ.
އަދި ކަނޑު ދަތުރުކުރާ ފަރާތްތަކުން މޫސުމަށް ސަމާލުވުމަށް މެޓް އޮފީހުން ވަނީ އިލްތިމާސް ކޮށްފައެވެ.
