ޤަވާއިދާ ޚިލާފަށް އުޅޭ ބިދޭސީން ރަޖިސްޓްރީ ކުރުމަށް ހުޅުވާލި ފުރުސަތުގައި 20،000 އަށްވުރެ ގިނަ ބިދޭސީން ރަޖިސްޓަރކޮށްފައިވާ އިކޮނޮމިކް މިނިސްޓްރީން ބުނެފިއެވެ.
އިކޮނޮމިކް މިނިސްޓްރީން ބުނީ ޤާނޫނާއި ޤަވާއިދާ ޚިލާފަށް މަސައްކަތް ކުރާ ބިދޭސީންގެ މައްސަލަ ޙައްލުކުރުމަށް ގިނަ މަސައްކަތްތަކެއް ކުރަމުންދާ ކަމަށެވެ. އެގޮތުން ރެގިއުލަރައިޒޭޝަން ޕްރޮގުރާމުގެ ފުރަތަމަ ބުރުގައި 20،000 އަށްވުރެ ގިނަ ބިދޭސީން ރަޖިސްޓްރީކޮށްފައިވާ ކަމަށެވެ.
ޤަވާއިދާ ޚިލާފަށް މަސައްކަތްކުރާ ބިދޭސީންގެ ލިޔެކިއުންތައް ނުހުންނަކަން ފާހަގަކޮށް މިނިސްޓްރީން ބުނީ އެފަދަ މީހުން ޤައުމަށް ފޮނުވާލަން ގިނަ ދަތިތަކާ ކުރިމަތިވާ ކަމަށާއި، މިމައްސަލަ ޙައްލުކުރުމަށް ބަންގްލަދޭޝް ސަރުކާރުގެ އެހީތެރިކަން ބޭނުންވާ ކަމަށެވެ.
ރާއްޖޭގައި ޤަވައިދާ ޚިލާފަށް މަސައްކަތްކުރާ ބިދޭސީން ރެގިއުލޭޓްކޮށް ޤާނޫނީ އިމުގެ ތެރެއަށް ވެއްދުމުގެ މަސައްކަތް ފެށީ ސެޕްޓެމްބަރު މަހުގެ 19 ވަނަ ދުވަހެވެ.
ރާއްޖޭގައި ޤަވާއިދާ ޚިލާފަށް 105،000 އެއްހާ ބިދޭސީން އުޅޭކަމަށް ލަފާ ކުރެވިފައިވެއެވެ. އަދި އޭގެ ތެރެއިން ގިނަ މީހުންގެ އަތުގައި ޕާސްޕޯޓް އަދި ވޯރކްޕާމިޓް ފަދަ ރަސްމީ ލިޔެކިޔުމެއް ނެތެވެ. ޕާސްޕޯޓް ނެތް މީހުންގެ ޕާސްޕޯޓް ހެއްދުމުގައި ދަތިތަކާކުރިމަތިވެފައިވެއެވެ.
