ކުޑަ ކުދިންނަށް ވެކްސިން ދިނުމަށް ދެކޮޅު ހެދި ބެލެނިވެރިއެއްގެ ކުދިންތަކަށް ވެކްސިން ދީފިއެވެ.
ފުލުހުން ބުނީ ކުޑަ ކުދިންނަށް ވެކްސިން ދިނުމަށް ދެކޮޅު ހަދަމުން ދިޔަ މީހަކު ފުލުހުންގެ ބެލުމުގެ ދަށަށް ގެނައުމަށްފަހު، ޖެންޑާ މިނިސްޓްރީގެ ފަރާތުން އެމީހުންނަށް ނަސޭހަތްތެރިވި ކަމަށެވެ.
ފުލުހުން ބުނީ ބުރާސްފަތި ދުވަހު އެގޭ ކުޑަކުދިންނަށް ވެކްސިން ދޭން އެކުދިންގެ ބެލެނިވެރިން އެއްބަސްވުމުން ތިން އަހަރު ދަށުގެ ކުޑަ ކުދިންނަށް މިހާރު ވެކްސިން ދީފައިވާ ކަމަށެވެ.
ފުލުހުން ބުނީ ވެކްސިން ދީފައިވަނީ ތިން ކުދިންނަށް ކަމަށެވެ. އެއީ ހަތަރު އަހަރުގެ ފިރިހެން ކުއްޖަކާއި، ދެއަހަރުގެ ފިރިހެއް ކުއްޖެއްގެ އިތުރުން އެއް މަހުގެ އަންހެން ކުއްޖަކަށް ކަމަށެވެ.
މިއީ މިހާރު ފުލުހުން ހަރުކަށި ފިކުރު ގަބޫލުކުރާ މީހުން ހޯދުމަށް ފުލުހުންނާއި އެމްއެންޑީއެފް ގުޅިގެން ހިންގާ އޮޕަރޭޝަންގެ ތެރެއިން، ފެންމަތިވީ މައްސަލައެކެވެ. މިއޮޕަރޭޝަން ގައި މިހާރު ވަނީ 3 މީހަކު ހައްޔަރުކޮށް އެމީހުންގެ ބަންދަށް 10 ދުވަސް ޖަހާފައެވެ.
މިއޮޕަރޭޝަންގައި ލިބިފައި ހުރި މައުލޫމާތުގެ އަލީގަ ކުޑަ ކުދިންނަށް ވެކްސިން ދިނުމާއި ތައުލީމުން މަހުރޫމް ކުރެވިފައިވާކަން ފާހަގަކުރެވިފައިވާ ކަމަށް ފުލުހުން ވަނީ ހާމަކޮށްފައެވެ. މިއީ އަންހެނުންނާއި ކުޑަކުދިންގެ ރައްކާތެރިކަން ކަށަވަރުކުރުމުގެ ގޮތުން ހިންގާ އޮޕަރޭޝަނެއް ކަމަށްވެސް ފުލުހުން ވަނީ މައުލޫމާތު ދީފައެވެ.
