ބްރޯޑްކާސްޓިން ކޮމިޝަން (ބްރޯޑްކޮމް) ގެ ރައީސް މަރިޔަމް ވަހީދާ ސަރުކާރުގެ އިވެންޓެއް ހުށައެޅި މައްސަލަ ރައްޔިތުން މަޖިލީހުގެ މިނިވަން މުއައްސަސާއާ ބެހޭ ކޮމެޓީން ބަލަން ނިންމައިފިއެވެ.
އަންގާރަ ދުވަހު ޓޫރިޒަމް މިނިސްޓްރީން އަލަށް ފަތުރުވެރިކަމަށް ރަށްތައް އިޢުލާން ކުރުމަށް ދަރުބާރުގޭގައި ބޭއްވި "ބުރަބި" ޖަލްސާ މަރިޔަމް ވަހީދާ ހުށައަޅާދެއްވުމުން ގިނަ ބައެއްގެ ފާޑު ކިޔުން ވަނީ ޢަމާޒުވެފައެވެ.
މިމައްސަލައާ ގުޅިގެން މިނިވަން މުއައްސަސާތަކުގެ ކޮމިޓީގެ މުޤައްރިރު އަދި އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވީ ޗުއްޓީއަށް ފަހު މަޖިލިސް ހުޅުވުމުން މިމައްސަލަ ކޮމެޓީން ބަލާނެ ކަމަށެވެ. މިނިވަން މުއައްސަސާތަކަށް ރައްޔިތުންގެ އިތުބާރު ހޯދުމަށް ކުރަންޖެހޭ މަސައްކަތްތައް މިނިވަން މުއައްސަސާ ކޮމެޓީން ފަސް ޖެހުމެއް ނެތި ކުރަމުންގެންދާނެ ކަމަށް މެންބަރު ރޮޒެއިނާ ވިދާޅުވިއެވެ.
މަރިޔަމް ވަހީދާ ޝޯވ ހުށައަޅާދެއްވާފައިވާތީ އެ ކޮމިޝަނުގެ މިނިވަންކަމާއި މެދު ސުވާލު އުފެދޭ ކަމަށް ބުނެ ބައެއް ފަރާތްތަކުން ވަނީ ފާޑުކިޔާފައެވެ.
މަރިޔަމް ވަހީދާއަކީ ދާދި ފަހުން ބްރޮޑްކާސްޓިންގ ކޮމިޝަނަށް ޢައްޔަނުކުރި ތިން މެންބަރުންގެ ތެރެއިން އެއް ބޭފުޅެކެވެ. މަރިޔަމް ވަހީދާއަކީ ގިނަ ދުވަސްތަކެއް ވަންދެން މީޑިއާގައި މަސައްކަތްކުރައްވާފައިވާ، އަދި ގިނަ ޝޯތަކެއް ހޯސްޓް ކުރައްވާފައިވާ ތަޖުރިބާކާރެކެވެ.
