''ދިވެހިންގެ އުއްމީދީ ޕާޓީ'' ގެ ނަމުގައި ސިޔާސީ ޕާޓީއެއް އުފެއްދުމުގެ މަސައްކަތް ކުރުމުގެ ހުއްދަ އިލެކްޝަން ކޮމިޝަން (އީސީ) އިން ދީފިއެވެ.
އަންގާރަ ދުވަހު އީސީން ''ދިވެހިންގެ އުއްމީދީ ޕާޓީ'' އުފެއްދުމުގެ ހުއްދަ ދޫކޮށްފައިވަނީ މ.ރީފްސައިޑް، މުހައްމަދު ސައީދަށެވެ.
އީސީގެ ގަވާއިދު ބުނާގޮތުންނަމަ އާ ސިޔާސީ ޕާޓީއެއް އުފައްދަން 3،000 މެމްބަރުން ހަމަކުރަންޖެހެއެވެ. މިކަން ކުރުމަށް ތިން މަސް ދުވަހުގެ މުއްދަތެއް ލިބެއެވެ. އަދި ޕާޓީ އުފައްދަން ބާއްވާ ޖަލްސާ ބޭއްވޭނީ އެންމެ މަދުވެގެން 300 މެމްބަރުން ހަމަވެގެންނެވެ.
އީސީން ދިވެހިންގެ އުއްމީދީ ޕާޓީއެއް އުފެއްދުމަށް ހުއްދަދީފައިވާއިރު، މިދިޔަ ނޮވެމްބަރު މަހު ދިވެހި އެންމެންގެ ނަމުގައި ޕާޓީއެއް އުފެއްދުމަށް ހުއްދަދީފައިވެއެވެ.
އީސީގެ ދަފްތަރުގައިވާ ގޮތުން 53،441 މެމްބަރުންނާއި އެކު އެންމެ ގިނަ މެމްބަރުން ތިބީ ސަރުކާރު ކޯލިޝަންގައި ހިމެނޭ އެމްޑީޕީގައެވެ. ދެވަނައަށް އެންމެ ގިނަ މެމްބަރުން ތިބީ އިދިކޮޅު ޕީޕީއެމްގައެވެ. އެއީ 36،706 މެމްބަރުންންނެވެ. ތިންވަނައަށް އެންމެ ގިނަ މެމްބަރުން ތިބި ޕާޓީއަކީ މަޝްހޫރު ވިޔަފާރިވެރިޔާ އަދި ރައްޔިތުންގެ މަޖިލީހުގެ މާމިގިލި ދާއިރާގެ މެމްބަރު ގާސިމް އިބްރާހިމްގެ ޖުމްހޫރީ ޕާޓީ އެވެ. އެއީ 10،363 އެވެ.
