ހދ ވައިކަރަދޫގައި ހިނގި ނުރައްކާތެރި އެކްސިޑެންޓުގައި ޙާލު ސީރިއަސްވި މީހާއަށް ހދ ކުޅުދުއްފުށީ ރީޖަނަލް ހޮސްޕިޓަލުގައި ފަރުވާދެމުންދާ ކަމަށް ފުލުހުން ބުނެފި އެވެ.

ފުލުހުން ބުނީ ހޯމަ ދުވަހުގެ ރޭ އިރާކޮޅު ވައިކަރަދޫ ގައި ދެ ސައިކަލެއް ޖެހި ނުރައްކާތެރި އެކްސިޑެންޓެއް ހިނގާފައިވާ ކަމަށެވެ. މި އެކްސިޑެންޓުގައި 48 އަހަރުގެ ފިރިހެން މީހާގެ ބޯ ފަޅައިގެން ގޮސް ޙާލު ސީރިއަސްވެގެން ކުޅުދުއްފުށީ ރީޖަނަލް ހޮސްޕިޓަލުގައި ފަރުވާދެމުންދާ ކަމަށް ފުލުހުން ބުނެ އެވެ.

މި އެކްސިޑެންޓުގައި ހިމެނޭ ދެ ވަނަ މީހާއަށް ވައިކަރަދޫ ޞިއްޙީ މަރުކަޒުން ފަރުވާދެމުންދާ ކަމަށާއި، އޭނާގެ ޙާލު ސީރިއަސް ނޫންކަމަށް ފުލުހުން ބުނެއެވެ. އޭނާގެ އުމުރަކީ 20 އަހަރެވެ.

މި ދެމީހުން ސައިކަލު ދުއްވާފައިވާއިރު މިއިން އެކެއްގެ އަތުގައިވެސް ލައިސަންސް ނެތް ކަމަށް ފުލުހުން ބުނެއެވެ.

މި އެކްސިޑެންޓް ހިނގަން މެދުވެރިވި ސަބަބު ތަހުޤީޤުކުރަމުންދާ ކަމަށްވެސް ފުލުހުން ބުނެއެވެ.