ސީރިޔާއަށް ހަނގުރާމައަށް ދިޔަ ދިވެހިންގެ ތެރެއިން މިހާރު ސީރިޔާގައި ތިބި ދިވެހިން ކުރިޔަށް އޮތް ހައެއްކަ ނުވަތަ ހަތްމަސް ދުވަހުގެ ތެރޭގައި ބޭރުގެ އެހެން ދަޢުލަތަކާއި ގުޅިގެން ރާއްޖެ ގެނެސް ރިހިބިލިޓޭޓް ކުރުމުގެ މަސައްކަތް ކުރިޔަށް ގެންދެވޭނެ ކަމަށް ކޮމިޝަނަރ އޮފް ޕޮލިސް މުޙައްމަދު ހަމީދު ވިދާޅުވެއްޖެ އެވެ.

މީގެކުރިން ބޭއްވި ނޫސްވެރިންގެ ބައްދަލުވުމެއްގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެފައިވަނީ ސީރިޔާގެ ހަނގުރާމަ އަށް ފަހު، އެކި ކޭމްޕްތަކުގައި ޙަލުގައި ޖެހިފައި ތިބި ދިވެހިން އަނބުރާ ރާއްޖެ ގެނައުމުގެ މަސައްކަތް ކުރައްވާ ކަމަށެވެ. އަދި އެމީހުން ރިހިބިލިޓޭޓް ކުރުމަށް އެކަމާބެހޭ ތަނެއް ރާއްޖޭގައި ހަދާ ބޭރު ޤައުމުތަކުގެ އެހީ އާއެކު އެކަން ކުރައްވާނެ ކަަމަށް ރައީސް ޞާލިހު ވަނީ ވިދާޅުވެފަ އެވެ.

ހުރިހާ ކައުންސިލްތަކަށް ދަޢުވަތުދީގެން ކްރޮސް ރޯޑްސްގައި ސަރުކާރުން ކުރިއަށް ގެންދިޔަ "ވިއަވަތި ރާއްޖެ" މަހާސިންތާގައި ރާއްޖޭގައި ހައްދުފަހަނަ އަޅާ ދިޔުމުގެ ކަންކަން ގޮސްފައި އޮތް ހިސާބާއި އެކަމާމެދު ސަރުކާރުން ކުރަމުން ގެންދާ މަސައްކަތްތަކާއި ގުޅޭގޮތުން ކައުންސިލަރުންނަށް މަޢުލޫމާތު ދެއްވަމުން ސީޕީ ވިދާޅުވީ ސީރިޔާގައި މިހާރު ތިބީ 59 ދިވެހިން ކަމަށެވެ. އަދި މީގެ ތެރެއިން 91 އިންސައްތަ އަކީ އަންހެނުންނާއި ކުޑަކުދިން ކަމަށް ސީޕީ ވިދާޅުވި އެވެ. އަދި ރާއްޖެ ގެނެވޭ ފަދަ ޙާލަތެއްގައި ތިބީ 4 ފިރިހެނުން ކަމަށް ސީޕީ ވިދާޅުވި އެވެ.

ހަނގުރާމަ އަށް ދިއުމަށް ފަހު އަންނަ މީހުން ރިހެބިލިޓޭޓްކުރާ މަރުކަޒު ހަދަން މަސައްކަތް ފަށާފައިވާއިރު، ޓެރަރިޒަމްގެ ޤާނޫނަށް ފަހުން ގެނައި އިޞްލާޙުގައި އެފަދަ މަރުކަޒެއް ހުރުން ލާޒިމުކުރެއެވެ.

ކ. ހިންމަފުށީގައި މި މަރުކަޒު އަޅަނީ ޕޮލިސް ވެލްފެއަރ ކޯޕަރޭޝަން (ޕޮލްކޯ) އިން ކަމަށާއި މިމަސައްކަތަށް 49 މިލިއަން ރުފިޔާ ޚަރަދުވާނެ ކަމަށް ހޯމް މިނިސްޓްރީން ވަނީ މީގެ ކުރިން ބުނެފަ އެވެ.

ސީރިޔާގައި ކުރިޔަށް ދާ ދާޚިލީ ހަނގުރާމައިގައި ބައިވެރިވުމަށް ރާއްޖެއިން 173 މީހަކު ދިޔަ ކަމަށް ސީޕީ ވިދާޅުވި އެވެ.