ރާއްޖޭގެ އެކި ކަންކޮޅުތަކުގައި އިސްލާމީ ހަރުކަށި ފިކުރަށް ތަބާވެ، ޖެހިގެން ހުރި މީހާގެ ފުރާނަ ނަގާލަން ފަސްނުޖެހޭ ވަރަށް އެފިކުރުގެ ތެރެއަށް 1400 އާ ގާތްކުރާ އަދަދެއްގެ ދިވެހިން އުޅޭކަމަށް ކޮމިޝަނަރ އޮފް ޕޮލިސް މުޙައްމަދު ހަމީދު ވިދާޅުވެއްޖެ އެވެ.

ރާއްޖޭގައި ހަރުކަށި ފިކުރުގެ ނުރައްކާ އޮތް މިންވަރު ހާމަކޮށްދެއްވަމުން ރާއްޖޭގެ ހުރިހާ ކައުންސިލްތަކަށް ދަޢުވަތުދީގެން ކްރޮސް ރޯޑްސްގައި ސަރުކާރުން ކުރިއަށް ގެންދިޔަ "ވިއަވަތި ރާއްޖެ" މަހާސިންތާގައި ހައްދުފަހަނާޅައިދިއުމުގެ ޢަމަލުތަކާ ދެކޮޅަށް ޙަރަކާތްތެރިވުމަށް ކައުންސިލުތަކުގެ އެއްބާރުލުމަށް ސީޕީ ހަމީދު ވަނީ އެދިވަޑައިގެންފަ އެވެ. އެކަމަށް ސީޕީ އެދިވަޑައިގެން ވަނީ ރާއްޖޭގައި ހަރުކަށި ފިކުރުގެ ކަންކަން ކުރިޔަށް ގޮސްފައި އޮތް ހިސާބު ތަފާސް ހިސާބުތަކުން ހިއްސާކޮށްދެއްވާފަ އެވެ.

އެގޮތުން ސީޕީ ވިދާޅުވީ ތަފާސް ހިސާބުތައް ދައްކާގޮތުން 173 މީހުން ސީރިޔާއަށް ދިޔަކަމަށެވެ. އަދި އެއީ ސީރިޔާ އަދި އިރާޤުގައި ހިނގާދިޔަ ދާޚިލީ ހަނގުރާމައަށް ވަންނަން ދިވެހިންގެ ތެރެއިން ޝައުގުވެރިކަން ހުރި އަދި އެކިގޮތްގޮތުން މަސައްކަތް ކުރި 423 މީހުން ގެ ތެރެއިން ސީރިޔާއަށް ދިޔަ މީހުންގެ ޢަދަދު ކަމަށް ސީޕީ ވިދާޅުވި އެވެ. މީގެތެރެއިން މިހާރު ބާކީ ސީރިޔާގައި ތިބީ 59 ދިވެހިން ކަމަށާއި އޭގެ ތެރެއިން 91 އިންސައްތަ އަކީ އަންހެނުންނާއި ކުޑަކުދިން ކަމަށް ސީޕީ ވިދާޅުވި އެވެ. މީގެތެރެއިން ރާއްޖެ އާދެވޭފަދަ ޙާލަތުގައި ތިބީ 4 ފިރިހެނުން ކަމަށްވެސް ސީޕީ ވިދާޅުވި އެވެ.

ސީޕީ ވިދާޅުވީ ސީރިޔާގެ ހަނގުރާމައިގެ ކުރިންވެސް އަފްޣާނިސްތާއި ޕާކިސްތާނު ގެ ހަމަނުޖެހުމުގެ ތެރޭގައިވެސް ދިވެހިންގެ ތެރެއިން އެތައް ސަތޭކަ ބަޔަކު ބައިވެރިވެފައިވާ ކަމަށެވެ.

މީގެއިތުރުން ސީޕީ ވިދާޅުވީ ސީރިޔާ އަދި އިރާޤުގައި އައިސިސް ބަލިކަށިވެގެންދިޔުމާއި ގުޅިގެން ދުނިޔޭގެ އެކި ދިމަދިމާލުގައި އިސްލާމިކް ސްޓޭޓަށް ވާގިވެރިވާ ނުވަތަ އިސްލާމިކް ސްޓޭޓްގެ ގޮފިތައް އުފެއްދުމުގެ މަސައްކަތްވެސް ފުޅާކުރެވިގެންދާ ކަމަށެވެ. އަދި މިކަމުގައި ދިވެހިންގެ ޝައުޤުވެރިކަން ހުރި ކަންވެސް ފާހަގަކުރެވިފައިވާ ކަމަށް ސީޕީ ވިދާޅުވިއެވެ.

ސީޕީ ވިދާޅުވީ އެފަރާތްތަކާއެކު ގެންދާ ތުއްތު ކުދިންނަށް ލިބެމުން އަންނަ ގެއްލުން އެއީ ފާހަގަކުރެވޭ ކަމެއް ކަމަށެވެ. ކޮންމެ ދުވަހަކު ސީރިޔާގައި ތާށިވެފައި ތިބި ދިވެހި އެތައް ރައްޔިތުންގެ އާއިލާތަކުން މެސެޖުތައް ފޮނުވަމުންދާ ކަމަށާއި މަސައްކަތް ކުރަމުންދަނީ އެކަމަށް ޙައްލެއް ގެނައުމަށް ކަމަށް ސީޕީ ވިދާޅުވި އެވެ.

މީގެއިތުރުން ސީޕީ ވަނީ ފުލުހުންވެސް ތިބޭ ރަށްރަށުގައި މިފިކުރު ފެތުރި ބޮޑުވަމުން އަންނަކަން ފާހަގަކުރައްވާފަ އެވެ. އަދި މި ނުރައްކަލުގެ ތެރެއަށް މުޅި ރައްޔިތުން ހުށަހެޅި ނުރައްކާތެރި ޙަރަކާތްތައް ނުވަތަ ޢަމަލުތައް ފެނިގެންދާ ދިޔުން އެއީ ކަންބޮޑުވާންޖެހޭ ކަމެއް ކަމަށް ސީޕީ ވިދާޅުވި އެވެ.

އެހެންކަމުން އެކަންކަން ޙައްލުކުރުމަށް މަސައްކަތް ކުރައްވަމުން ގެންދަވާ ކަމަށްވެސް ސީޕީ ވިދާޅުވި އެވެ.

ސީޕީ ވިދާޅުވީ ޓެރަރިޒަމާއި، ވައިލެންޓް އެކްސްޓްރީމިޒަމް އާ ދެކޮޅަށް އަޅަންޖެހޭ ފިޔަވަޅުތައް އަޅަމުން ގެންދާނެކަމަށެވެ. އެކަމަށް ފަސްނުޖެހޭނެ ކަމުގެ ޔަޤީންކަން ދެއްވާ ކަމަށް ސީޕީ ވިދާޅުވި އެވެ.