ނަކަލުކޮށްފައިވާ ޕާސްޕޯޓެެއް ބޭނުންކޮށް ރާއްޖެއަށް އެތެރެވާން އުޅުނު މީހަކު އިމިގްރޭޝަން ބޯރޑަރ ސެކިއުރިޓީން ހިފަހައްޓައިފިއެވެ.

މޯލްޑިވިސް އިމިގްރޭޝަނުން ކޮށްފައިވާ ޓްވީޓެއްގައި ބުނެފައިވަނީ ކައުންޓަރޕިޓް ނުވަތަ ނަކަލުކޮށްފައިވާ ޕާސްޕޯޓެއް ބޭނުންކޮށްގެން ވެލާނާ އިންޓަރނޭޝަނަލް އެއާރޕޯޓްއިން ރާއްޖެ އެތެރެވުމަށް މަސައްކަތްކުރީ 31 އަހަރުގެ ބިދޭސީ ފިރިހެނަކު ކަމަށެވެ.

މިކަމާއި ގުޅިގެން ރާއްޖެއެމްވީއަށް މައުލޫމާތު ދެއްވަމުން އިމިގްރޭޝަނުން ބުނެފައިވަނީ، މި ހާދިސާ ހިނގާފައިވަނީ ޑިސެމްބަރު މަހުގެ 12 ވަަނަ ދުވަހުގައި ކަމަށާއި އިމިގްރޭޝަންގެ ގަވާއިދާއި އެއްގޮތަށް އެމީހާ އަނބުރާ ރާއްޖެއިން ފޮނުވާލާފައިވާކަމަށެވެ.

އިތުރަށް މައުލޫމާތުދެމުން އިމިގްރޭޝަނުން ބުނެފައިވަނީ އެމީހާއަކީ ކޮން ގައުމެއްގެ މީހެއްކަން އަދި ހާމަކުރެވެން ނެތްކަމަށާއި ނަކަލުކޮށްފައިވާ ޕާސްޕޯޓެއް ބޭނުންކޮށްފިނަމަ ރާއްޖެ އެތެރެވެވޭނެ އެއްވެސް އަސާސެއް ނެތްކަމަށެވެ.

އަހަރުގެ މިހާތަނަށް ނަކަލުކޮށްފައިވާ ޕާސްޕޯޓް ބޭނުންކޮށްގެން ނުވަތަ އޮޅުވާލައިގެން ރާއްޖެ އެތެރެވާން އުޅުނު 12 މީހަކު ވަނީ ހިފަހައްޓައިފައެވެ.