އެމްއާރްއެމް ގެ އިންތިޤާލީ ރައީސް، ރައީސް މައުމޫން ޢަބްދުލް ޤައްޔޫމްގެ އަނބިކަނބަލުން ނަސްރީނާ ހިމެނިވަޑައިގަންނަވާ ގޮތަށް އެމަނިކުފާނަށް ލަފާއެރުއްވުމަށް މަޝްވަރާ ކޮމިޓީ އެކުލަވާލައްވައިފިއެވެ.
އެމްއާރުއެމުން ބުނީ މި ކޮމިޓީގެ މައިގަނޑު މަސައްކަތަކީ ޕާޓީ ކުރިއަރުވައި ތަރައްޤީކުރުމުގައި، ޕާޓީގެ ރައީސް އަށް ލަފާދެއްވާ މަޝްވަރާ އެރުވުން ކަމަށެވެ.
12 ބޭފުޅުންގެ މައްޗަށް އެކުލެވޭ މި މަޝްވަރާ ކޮމެޓީގައި މައުމޫނުގެ އަނބިކަނބަލުންގެ އިތުރުން އެމަނިކުފާނުގެ ސަރުކާރުގައި ވަޒީރުކަން ކުރެއްވި ނަސްރީނާގެ ބޭބޭފުޅު އައްބާސް އިބްރާހީމާއި، ކުރީގެ ވަޒީރު އުމަރު ޒާހިރު ހިމެނިވަޑައިގެންނެވި އެވެ.
މީގެ އިތުރުން އަމީނިއްޔާ ސްކޫލާއި އިމާދުއްދީން ސްކޫލުގެ ވެސް ޕްރިންސިޕަލްކަން ކުރައްވާފައިވާ ވަފާ ވަހީދު އަދި ފުޓްޅަ ކޯޗު އަލީ ސުޒައިން އާއި ފިލްމީ ތަރި ނިއުމާ މުހައްމަދު ވެސް ހިމެނެއެވެ.
އެމްއާރުއެމްގެ އިންތިޤާލީ ރައީސް މައުމޫނަށް ލަފާ އަރުއްވަން އެކުލަވާލެއްވި ކޮމިޓީގެ ދެބައިކުޅަ އެއްބަޔަކީ އަންހެނުންނެވެ. މިއީ އަންހެނުން ބާރުވެރިކުރުމަށް އެ ޕާޓީން ކުރާ މަސައްކަތުގެ ތެރޭގައި ހިމެނޭ ކަމެކެވެ.
